काठमाडौँ - नेकपाको स्थायी कमिटी बैठक असार १६ गतेसम्मका लागि स्थगित भएको छ। पत्रकारहरूसंग कुरा गर्दै प्रवक्ता नारायणकाजी श्रेष्ठले बैठक दुई दिन स्थगित गरिएको जानकारी दिए ।

'भोलि मदन जयन्तीमा नेताहरू विभिन्न कार्यक्रममा सहभागी हुनुपर्ने र पर्सी १५ असार दहि चिउरा खाने दिन भएकोले अर्को बैठक पर्सि असार १६ गते ११ बजे पुन: बालुवाटारमै बस्ने छ' - प्रवक्ता श्रेष्ठले भने।

शुक्रबार स्थायी कमिटी बैठकमा नगएका प्रधानमन्त्री केपी ओली शनिबार ५ मिनेटमै स्वास्थ्यस्थिति अनुकूल नभएको भन्दै बाहिरिएका थिए।

शनिबार सीमाबारे स्थायी कमिटीमा छलफल भएको थियो। २१ जना स्थायी कमिटी सदस्यले सीमाबारे धारणा राखेको श्रेष्ठले बताए। भूमि फिर्ता ल्याउनुपर्छ भन्नेमा सदस्यहरूले धारणा राखेको उनको भनाइ छ।

असार १६ गते सीमाबारे केहीबेर छलफल गर्ने र कोरोनालगायत एजेन्डामाथि छलफल हुने उनले जानकारी दिए।