लण्डन - बेलायतका प्रधानमन्त्री बोरिस जोन्सनले ‘ब्रेक्जिट’ सम्झौतामा सहमति जुटाउन आग्रह गरिरहँदा चर्को विरोध भइरहेको छ । दशौं हजार नागरिक ब्रेक्जिटको विरोधमा सडकमा उत्रिएका छन् ।

केही दिनअघि मात्रै जोन्सन ईयूसँग सहमति भएपछि उत्साही बन्दै अब स्थिति सामान्य बन्ने प्रतिक्रिया दिएका थिए । शनिबार सोही सहमतिमाथि मतदान गर्न संसदको विशेष बैठक बसेको छ ।

बोरिसले सहमतिमा समर्थन जुटाउन सांसदहरुलाई आग्रह गर्दैआएका छन् । तर विपक्षी दल लगायत आम नागरिक विरोध जनाउँदै प्रदर्शनमा उत्रिएका हुन् ।

साइबेरियन सुन खानीको बाँध फुट्दा ११ को मृत्यु, दर्जनौँ वेपत्ता
मस्को : साइबेरियामा रहेको एक सुनखानीको बाँध भत्किँदा कम्तिमा ११ जनाको मृत्यु भएको छ । क्रास्नास्क सहरबाट १ सय ६० किलोमिटर दक्षिणी क्षेत्रमा रहेको सुन खानीमा यस्तो घटना भएको रुसी अनुसन्धान टोलीले यस्तो जनाएको हो ।

घटनामा १४ जना घाइते भएका छन् । साथै दर्जनौँ खानीका कामदार हराइरहेका छन् । घटनामा १४ जना घाइते भएका छन् । उनीहरुलाई उपचारका लागि अस्पताल लगिएको छ ।

कश्मीरमा मौन विरोध प्रदर्शन
श्रीनगर : भारत प्रशासित कश्मीरको स्वायत्तता खारेज भएको ७० दिनभन्दा धेरै भइसक्यो । भारत सरकारले हजारौँको संख्यामा सैनिक तैनाथ गरेको छ भने सञ्चार पनि पूर्ण रुपमा सञ्चालनमा आएको छैन ।

भारत सरकारको निर्णयको विरोध र स्वागतमा विभिन्न समूहले आआफ्नै किसिमका आन्दोलन गरे । यस क्रममा सयौँ कश्मिरीहरु हिरासतमा छन् । र यहाँको जनजीवन अझै सहज बन्न सकेको छैन ।

पछिल्लो समय यहाँ नागरिक अगुवा तथा राजनीतिज्ञहरुको पहलमा नयाँ किसिमको आन्दोलन भएको छ । श्रीनगर लगायत मुख्य सहरका पसलेहरु २ घण्टा मात्रै पसल खोलेर दिनभर सटर बन्द गर्छन् ।

अधिकांश स्कुल खाली छन् । ‘नागरिक अवज्ञा आन्दोलन’को रुपमा उनीहरुले मौन रुपमा विरोध जनाएका हुन् । पसलेहरु आम्दानी नै नभए पनि पसल बन्द गरेर विरोध जनाउँदैआएको अन्तर्राष्ट्रिय मिडियाले जनाएका छन् ।

स्पेनमा २ सय पृथकतावादी आन्दोलनकारी घाइते
बार्सिलोना : स्पेनमा जारी काटालोनिया पृथकतावादी आन्दोलनलाई प्रदर्शनलाई प्रहरीले दबाउन खोज्दा २ सय प्रदर्शनकारी घाइते भएका छन् । पृथकतावादी कट्टरपन्थीहरुले निकालेको प्रदर्शनमा झडपको क्रममा उनीहरु घाइते भएका हुन् ।

प्रदर्शन दबाउन प्रहरीले रबरका गोली प्रहार गरेको थियो । गृह मन्त्रालयका अनुसार ८३ जना पक्राउ परेका छन् । केही सातायता बार्सिलोनामा दशौं हजारको संख्यामा मानिस प्रदर्शनमा उत्रिएका छन् ।

साउदी नागरिक लेबननबाट फर्किँदै
रियाद : साउदी अरेबियाले लेबननमा रहेका आफ्ना नागरिकलाई फिर्ता बोलाएको छ । यसका लागि लेबननस्थित साउदी राजदूतावासले आफ्ना नागरिकलाई फिर्ता जान सहजीकरण गरेको जनाएको छ ।

पर्यटक तथा साउदी आप्रवासीलाई साउदीले फिर्ता बोलाएको हो । लेबननमा पछिल्लो समय हिंसा बढेपछि साउदीले यस्तो निर्णय गरेको हो । शनिबार मध्हान्नसम्म मात्रै ३ सय साउदी नागरिक फिर्ता भइसकेको अरबन्युजले जनाएको छ ।

चिलीमा संकटकाल घोषणा
चिली : चिलीका राष्ट्रपतिले राजधानी सान्टियागोमा संकटकाल घोषणा गरेका छन् । सुरक्षा जिम्मा सैनिकलाई जिम्मा लगाउँदै आपतकाल घोषणा गरेका हुन् । पछिल्लो समय चर्किको प्रदर्शन हिंसामा रुपान्तरण हुँदै गएपछि राष्ट्रपति सेबास्सियन पिनेराले यस्तो घोषणा गरेका हुन् ।

उनले राष्ट्रिय सुरक्षाको जिम्मा मेजर जेनरल जाभियर इतुरियागा डेल काम्पोलाई लगाउँदै संकटकाल घोषणा गरेका हुन् । ‘मैले संकटकाल घोषणा गर्दै मेजर जेनरल जाभियरलाई राष्ट्रिय सुरक्षामा नियुक्त गरेको छु,’ राष्ट्रपति पिनेराले भने । शुक्रबारदेखि नै विभिन्न स्थानका प्रदर्शन प्रहरीसँग भिडन्त हुँदै हिंसात्मक बनेका छन् ।

अमेरिकी राजदूतको निवासमै छिरेर कोरियालीले गरे प्रदर्शन
सोल : अमेरिकी फौज आफ्नो देशमा छिरेको भन्दै दक्षिण कोरियाली विद्यार्थीहरु अमेरिकी राजदूतको निवासमै छिरेर प्रदर्शन गरेका छन् । यसरी प्रदर्शन गर्ने १९ प्रदर्शनकारीलाई यहाँको प्रहरीले पक्राउ गरेको छ ।

कोरियाका लागि राजदूत ह्यारी हरिसको निवासको पर्खालमा उक्लिएरै उनीहरु कम्पाउन्डमा छिरेका थिए । प्रदर्शनकारीको समूह सोलस्थित राजदूतको निवासमै छिरेका हुन् । उनीहरुले प्रदर्शनको क्रममा अमेरिकालाई आफ्ना फौज फिर्ता लैजान माग गरेका छन् ।

‘यो भूमि छोड, हरिस’ नारा लेखिएको ब्यानर समेत उनीहरुले प्रदर्शन गरेका थिए । प्रहरीका अनुसार २० जना जति कोरियन नागरिक राजदूत ह्यारीको निवासमा अवैध रुपमा छिरेका थिए । ‘हाम्रो आन्तरिक मामिलामा हस्तक्षेप नगर’, ‘बाहिर जाऊ’, ‘हामीलाई अमेरिकी फौज चाहिँदैन’ जस्ता नारावाजी गर्दै उनीहरुले प्रदर्शन गरेका थिए ।