तेहरान - इरानका सर्वोच्च नेता अयोतोल्लाह अली खामेनीले अमेरिकासँग अमेरिकासँग वार्ता नहुने चेतावनी दिएका छन् । साथै तेहरानमाथि दबाव दिने अमेरिकी दबावको नीति पनि असफल हुने उनको दावी छ ।

‘इरानविरुद्ध चर्को दबावको नीति निकम्मा छ,’ खामेनीले टेलिभिजनमा अन्तर्वार्ता दिँदै यसो भनेका हुन् । उनले थपेका छन्, ‘इरानका सबै अधिकारीहरुलाई विश्वास छ कि, अमेरिकासँग कुनै पनि तहमा वार्ता हुनेछैन ।’

यदी वासिङ्टनले आफ्नो व्यवहार परिवर्तन गरेर २०१५ को परमाणु सम्झौतामा फर्किएको खण्डमा इरान अन्य समूहसहितको वहुपक्षीय छलफलमा सहभागी हुनसक्ने उनको अडान छ ।

अमेरिका–उत्तर कोरिया वार्ता यसकारण अन्योलमा
वासिङ्टन : अमेरिकी राष्ट्रपति डोनल्ड ट्रम्पको उत्तर कोरिया भ्रमणको तयारी तत्कालका लागि सम्भव देखिएको छैन । उत्तर कोरियाली नेता किम जोङ उनले ट्रम्पलाई उत्तर कोरिया भ्रमणको निम्तो दिएकोबारे कुनै प्रतिक्रिया दिएका छैनन् ।

‘सम्बन्ध निकै राम्रो छ, तर म त्यसमा प्रतिक्रिया दिन चाहन्न’ ट्रम्पले पत्रकारहरुसँग भनेका छन् । उत्तर कोरियाली नेताले ट्रम्पलाई भ्रमणको निम्तो दिएको समाचार आएपछि यसबारे पत्रकारहरुले ट्रम्पको प्रतिक्रिया खोजिरहेका छन् । ट्रम्पले आफ्नो कोरिया भ्रमण ‘कुनै समयमा वा भविष्यमा’ हुनसक्ने प्रतिक्रिया दिएका छन् ।

तर किम कहिले अमेरिका आउने भन्ने कुरामा निर्भर रहने बताएका छन् । तर भ्रमणका लागि अहिले नै तयारी अवस्था नभएको उनको भनाइ थियो । दक्षिण कोरियाको पत्रिकाले सोमबार मात्रै उत्तरका नेता किमले ट्रम्पलाई भ्रमणको निम्तो दिएको उल्लेख गरेको छ । ट्रम्पले भने तत्कालै भ्रमण ‘सम्भवतः नहुने’ बताए ।

जब कि, किमले अगस्ट तेस्रो हप्ताका लागि उत्तर आउन भन्दै ट्रम्पलाई पत्र पठाएको मिडियाले जनाएका छन् । तर ट्रम्पले यसअघि नै किमबाट ‘सुन्दर पत्र’ आएको बताएका थिए ।

ट्रम्प र किमले गत वर्ष जुन महिनायता तीन पटक भेटवार्ता गरिसकेका छन् । अघिल्लो दुई भेटवार्ता औपचारिक थिए । दोस्रो भेट फेब्रुअरीमा भियतनाममा भएको थियो । यस्तै तेस्रो पटक जुन ३० मा दुई कोरियाको सीमास्थित गैरसैनिक क्षेत्रमा उनीहरुको भेट भएको थियो ।

अफगानिस्तानमा राष्ट्रपतिलाई लक्षित गर्दै तालिबानी हमला, ३० जनाको मृत्यु
काबुल : अफगानिस्तानमा राष्ट्रपतिले सम्बोधन गर्ने र्‍यालीलाई लक्षित गर्दै भएको बम हमलामा ३० जना मारिएका छन् । यही सेप्टेम्बरमा हुन लागेको राष्ट्रपतीय निर्वाचन र्‍यालीलाई लक्षित गर्दै तालिबानी समूहले बम हमला गरेको थियो ।

मंगलबार राष्ट्रपति असरफ घानीले उक्त सभालाई सम्बोधन गर्ने तालिका थियो । सम्बोधनअघि नै त्यहाँ हमला गरिएको हो । तालिबानले पछिल्लो एक महिनाभित्रै तीनवटा भन्दा धेरै हमला गरिसकेको छ ।

अमेरिकासँग वार्ताको तयारी भइरहँदा तालिबानी समूहले श्रृंखलाबद्ध हमला गर्न थालेको हो । उसको हमलापछि नै अमेरिकाले वार्ता स्थगित भएको जनाएको थियो ।अफगानिस्तानमा आगामी सेप्टेम्बर २८ मा हुने भनिएको राष्ट्रपतीय निर्वाचन हुन नदिने तालिबानीले चेतावनी दिँदैआएको छ ।

अमेरिकामा लाखौं महिलाले स्वीकार गरे : पहिलो यौन सम्पर्क ‘बलात्कार’ थियो !
वासिङ्टन : अमेरिकामा हालै सार्वजनिक एक रिपोर्टका अनुसार हरेक १६ महिलामध्ये एकको पहिलो यौन अनुभव ‘बलात्कार’ हुने खुलासा भएको छ । अनुसन्धानमा सहभागी महिलाहरुले किशोरावस्थामै आफ्नो पहिलो यौन अनुभव पुरुषबाट ‘बलपूर्वक’ र ‘हिंस्रक’ हुने बताए ।

साथै त्यस्तो अनुभवले स्वास्थ्य समस्या निम्त्याउने पनि उनीहरुको अनुभव रह्यो । झण्डै ७ प्रतिशत महिलाहरुमाथि गरिएको उक्त अध्ययनमा महिलाहरुले आफ्नो अनुभव सुनाएका हुन् ।

उनीहरुले आफ्नो पहिलो यौन अनुभव इच्छाविपरीत हुने बताएका थिए । अनुसन्धाता डा. लौरा हक्सका अनुसार इच्छा विपरीत हुने यस्ता यौन सम्पर्क ‘बलात्कार’ हुन् । ‘पहिलो यौन सम्पर्कमै बलात्कार हुनु भनेको महिलाले यौनमा आफ्नो हक गुमाउनु हो,’ हक्सले भनिन् । यस्ता सम्बन्धले महिलालाई मानसिक र शारीरिक समस्या निम्त्याउनसक्ने हक्सको भनाइ छ ।

यस्तो खोजको तथ्य यही सोमबार ‘जामा इन्टरनल मेडिसिन’ नामको जर्नलमा प्रकाशित छ । यस्तै निरन्तर यौन शोषणका असरले सामाजिक वहिस्करण सिर्जना हुने अन्य अध्ययनले देखाएका छन् । जर्नलमा प्रकाशित रिपोर्ट अनुसार अनुसन्धानमा लाखौं महिला सहभागी थिए ।

जहाँ ‘तिम्रो पहिलो यौन सम्पर्क तिम्रो आफ्नै इच्छा अनुसार थियो त ?’ भनेर सोधिएको थियो । जवाफमा धेरैले पहिलो सम्पर्क इच्छा विपरीत भएको बताएका थिए । अमेरिकाबाटै केही वर्षयता सुरु भएको ‘मि टू’ अभियान विश्वभर फैलिएको छ ।

साउदी आक्रमणमा इरानको हात भएजस्तो देखिन्छ : ट्रम्प
वासिङ्टन : अमेरिकी राष्ट्रपति डोनल्ड ट्रम्पले साउदी अरेबियामा भएको हमलामा इरानको हात रहेको आशंका गरेका छन् । ट्रम्पले भनेका छन्, ‘तत्कालै यो घटना त्यस्तै देखिन्छ । र हामी तपाईँहरुलाई जानकारी गराउछौँ । सकेसम्म चाँडै हामीले पत्ता लगाएपछि । तर यो त्यस्तै देखिन्छ ।’

विश्वकै ५ प्रतिशत तेल उत्पादन गर्ने प्यानलमाथि यही साता ड्रोन हमला भएको थियो । यमनी विद्रोही हाउठी समूहले उक्त हमलाको दावी गरेको थियो ।
साउदीको उक्त घटनापछि विश्व अर्थतन्त्रमा नै असर पर्ने बताइएको छ ।

फिलिपिन्समा सडक दुर्घटनामा २० को मृत्यु
मनिला : फिलिपिन्समा मंगलबार भएको ट्रक दुर्घटनामा २० जनाको मृत्यु भएको छ । बालबालिका सहितको समूहलाई ट्रकले समुद्रकिनारबाट घरतर्फ ल्याउँदै थियो ।
खराब सडकका कारण गाडी ब्रेक फेल भइ पल्टिएको प्रहरीले जनाएको छ । प्रहरीले घटनाको अनुसन्धान गरिने जनाएको छ । प्रारम्भिक अवस्थामा मृतकको संख्या १५ थियो ।

जापानी प्रधानमन्त्री र इरानी राष्ट्रपति भेटवार्ता गर्दै
टोकियो : जापानका प्रधानमन्त्री सिन्जो अबेले इरानी राष्ट्रपतिसँग भेट गर्ने बताएका छन् । यही महिनाको अन्त्यमा इरानी राष्ट्रपति हसन रौहनीसँग भेट्ने मंगलबार जानकारी दिएका हुन् ।

मध्यपूर्वी क्षेत्रमा पछिल्लो समय बढेको तनाबका बीच सिन्जोले भेट गरी छलफल गर्ने जनाएका हुन् । जापानी टेलिभिजन एनएचकेले यसबारे उल्लेख गरेको छ । साउदीमा हमलापछि विश्व अर्थतन्त्रमै खतरा देखिने अन्तर्राष्ट्रिय मिडियाको टिप्पणी छ ।

इरानमा समातिएका अष्ट्रेलियन नागरिकमाथि मुद्दा
तेहरान : इरानमा पक्राउ परेका तीन अष्ट्रेलियन नागरिक जासुसी भएको भन्दै उनीहरुविरुद्ध मुद्दा दर्ता भएको छ । अन्तर्राष्ट्रिय मिडियाका अनुसार इरानको न्यायालयले उनीहरुलाई दुई फरक मुद्दा दर्ता गरेको छ ।

तेहरानका अधिकारीहरुका अनुसार अष्ट्रेलियन नागरिकमध्ये दुईले ड्रोनबाट सैन्य क्षेत्रका तस्बिर खिच्दैगरेको आरोप लगाइएको छ । गत हप्ता मात्रै उनीहरु इरानमा पक्राउ परेका हुन् । पक्राउ पर्नेमा दुईजना ‘ट्राभल ब्लगर’ र एकजना विश्वविद्यालयका प्राचार्य भएको पुष्टि भएको छ ।