बेइजिङ - चिनियाँ राष्ट्रपति सि जिन पिङले चीन यतिबेला ‘एकीकृत जोखिम’मा फसेको बताएका छन् । आर्थिक, राजनीतिक र कुटनीतिक चुनौतीसँग चीन जुध्नुपर्ने उनले बताए ।

७०औं वार्षिकोत्सवका अवसरमा विशाल सैन्य परेडका बीच उनले मंगलबार यस्तो बताएका हुन् । पछिल्लो समय अमेरिकासँग व्यापार युद्ध चलिरहँदा सिले यस्तो बताएका हुन् । साथै पार्टीको केन्द्रीय स्कुल विभागका नेताहरुको सभालाई सम्बोधन गर्दै उनले राष्ट्रिय स्वाधिनता, सुरक्षाका लागि संघर्ष गर्नुपर्ने बताए ।

इमरान खानको भारत अनुभव : हिन्दुस्तानमा यति सम्माम मिल्यो कि म त हैरान भएँ
इस्लामाबाद : पाकिस्तानी प्रधानमन्त्री इमरान खानले भारतसँग जोडिएका आफ्ना अनुभुति सार्वजनिक गरेका छन् । उनले भारतमा आफू सम्मानित भएको महसुश गरेको बताए । खानले कुनै पनि धर्मले अत्याचारको अनुमति नदिने भन्दै हिन्दू धर्ममा पनि त्यस्तो नभएको बताए ।

बिबिसी हिन्दीका अनुसार लाहोरमा उनले अन्तर्राष्ट्रिय शिख सम्मेलनमा उनले यस्तो मन्तव्य दिएका हुन् । जहाँ उनले हिन्दुस्तान, शिख र कश्मीर जस्ता विषयमा आफनो धारणा राखेका थिए । उनले भने, ‘जब म पहिलो पटक क्रिकेट खेल्न हिन्दुस्तान गएँ एक अलग किसिमको मुलुक पाएँ, त्यहाँ मलाई खुबै सम्मान, प्यार, इज्जत दिइयो । यो देखेर म अचम्ममा परेँ, यति धेरै नकारात्मक भावना थियो, दुश्मनको मुलुक सम्झिरहेको थिएँ । तर मैले यति धेरै इज्जत पाएँ । आज पनि मेरा केही साथी छन् ।’
उनले आफू प्रधानमन्त्री बनेपछि भारतसँग सम्बन्ध विस्तार गर्न चाहेको बताए ।

दक्षिण अफ्रिकामा हिंसात्मक आन्दोलन
जोहानेसबर्ग : दक्षिण अफ्रिकामा विदेशी–विरोधी आन्दोलन भड्कीएको छ । प्रदर्शनमा उत्रिएका मानिसले जोहानेसबर्गस्थित विदेशीले सञ्चालन गरेका पसल तोडफोड गर्नुका साथै आगलागी समेत गरेका छन् ।

प्रहरीले यस्तो प्रदर्शनलाई हिंसा भड्कीएको जनाएको छ । प्रदर्शनलाई नियन्त्रण गर्न प्रहरीले रबर गोली चलाउनुका साथै अश्रुग्यास प्रहार गरेको छ । साथै दर्जनौँ प्रदर्शनकारीलाई पक्राउ गरेको छ । खासगरी सहरको व्यापारिक केन्द्रमा हिंसात्मक प्रदर्शन भएको हो । दर्जनौँ पसल तोडफोड हुनुका साथै लुटिएको छ । जोहानेसबर्गस्थित सोमबार सयौँ मानिस सडकमा ओर्लिएमा थिए । साथै विदेशीलाई यहाँको व्यापारबाट निकाल्नुपर्ने उनीहरुको माग छ ।

अफगानिस्तानबाट सेना फिर्ता गर्ने अमेरिकाको तयारी
वासिङ्टन : अमेरिकाले अफगानिस्तानबाट ५ महिनाभित्र आफ्ना सेना फिर्ता लैजाने तयारी गरेको छ । यसबारे तालिबान लडाकु समूहसँग एक सहिमति नै भएको बताइएको छ ।

अफगानिस्तानका लागि अमेरिकी राजदूतले एक टेलिभिजनलाई अन्तर्वार्ता दिँदै सहमतिको विवरण समेत सार्वजनिक गरेका थिए । तर उनको अन्तर्वार्ता प्रशारण भएकै समयमा काबुलमै तालिबानी समूहले दर्जन बढीको ज्यान जाने गरी एक आत्मघाती हमला गरेका छन् । यसअघि नै अमेरिकी राष्ट्रपति डोनल्ड ट्रम्पले अफगानिस्तानबाट आफ्ना सेना फिर्ता गर्ने घोषणा गरिसकेका थिए ।

अमेरिकासँग वार्ता नगर्ने इरानको घोषणा
तेहरान : इरानी राष्ट्रपति हसन रौहनीले अमेरिकासँगको वार्ता अस्वीकार गरेका छन् । साथै उनले केही दिनमै अमेरिकासँगका सम्झौता रद्द गर्ने चेतावनी पनि दिएका छन् । मंगलबार संसदलाई सम्बोधन गर्दै रौहनीले यस्तो बताएका हुन् ।

यदी अमेरिकाले सबै प्रतिबन्ध फकुवा गरेपछि मात्रै सामूहिक वार्ता सम्भव भएको उनको भनाइ थियो । ‘सायद गलत बुझाइ पनि हुन सक्छ, हामीले धेरै पटक भनेका छौँ र हामीले दोहोर्याएका छौँ कि, अमेरिकासँग दुईपक्षीय वार्ताको कुनै निर्णय भएको छैन,’ रौहनीले भने । उनले भनेका छन्, ‘सैद्धान्तिक रुपमै हामी अमेरिकासँग वार्ता चाहँदैनौँ ।’ अमेरिका र इरानबीच गत वर्ष मे महिनादेखि तनाब बढ्दैगएको छ ।

डुंगामा आगोलागी हुँदा २५ को ज्यान गयो
वासिङ्टन : अमेरिकाको क्इालिफोर्नियास्थित डुंगामा आगोलागी हुँदा २५ जनाको ज्यान गएको छ । सुरक्षा अधिकारीहरुका अनुसार प्रारम्भीक चरणमा २० जनाको मात्रै शव भेटिएको थियो । पछि थप पाँचको शव भेटिएको हो । डुंगामा आगोलागी हुँदा पाँचजना बाँच्नका लागि भागेका थिए । यस क्रममा क्र्यू सदस्यहरुको एक समूहलाई भने उद्धार गरिएको थियो । अमेरिकामा सोमबार राति यस्तो घटना भएको हो ।

अमेरिकी सेना फिर्ताको सहमतिसँगै तालिबानी हमला
काबुल : अफगानिस्तानको राजधानी काबुलमा आत्मघाती बम हमला हुँदा १६ जना मारिएका छन् । अरु एक सय भन्दा धेरै घाइते छन् । तालिबानी समूहले आक्रमणको जिम्मा लिएको छ । ग्रिन भिलेज नजिकै आवासीय क्षेत्रमा बम हमला भएको हो ।

अफगानिस्तानको मुख्य टेलिभिजन तोलो युजले अमेरिकी राजदूत जालमे खालिलजादसँग अन्तर्वार्ता लिइरहँदा उक्त हमला भएको थियो । अन्तर्वार्ताको क्रममा राजदूत खालिलजादले अफगानिस्तानबाट सेना फिर्ता गर्ने तयारीबारे कुरा गरिरहेका थिए ।