दोहा - सन् २०२२ मा कतारमा आयोजना हुने विश्व कप फुटबलमा ३२ टोलीको मात्र सहभागिता रहने विश्व फुटबल महासंघ (फिफा)ले जनाएको छ । फिफाले यसअघि कतार विश्वकपदेखि नै सहभागी संख्या ३२ बाट बढाएर ४८ बनाउने विषयमा छलफल र तयारी गरिरहेको थियो । गल्फ राष्ट्रबीच देखिएको आन्तरिक टकरावका कारण सहभागी संख्या बढाउन गाह्रो भएको फिफाले जनाएको छ ।

‘मध्यपूर्वी गल्फ क्षेत्रमा अहिले राजनीतिक परिस्थिति बिग्रिएको छ । कतारले मात्र ४८ टोली र समर्थकको चाप धान्न नसक्ने देखिन्छ । त्यसैले फिफा ३२ टोलीलाई नै निरन्तरता दिने निर्णयमा पुगेको हो । कतारले मानव अधिकार, श्रमसम्बन्धी कुनै पनि समस्याबिना विश्वकप आयोजना गर्ने विश्वास व्यक्त गरिरहेको छ । व्यवस्थापन सहज बनाउन सहभागी संख्या बढाउन सकिएन’, फिफाका अध्यक्ष जियानी इन्फान्टिनोले भनेका छन् ।

फिफाको अध्ययनअनुसार कतारमा सहभागी टोली संख्या बढाउँदा कम्तीमा १६ खेल कतारबाहिर खेलाउनुपर्ने अवस्था देखिएको थियो । हाल छिमेकी राष्ट्रसँग कतारको सम्बन्ध चिसिएको छ । कतारलाई लामो समयदेखि छिमेकी मुलुकहरुले नाकाबन्दी गर्दै आएका छन् । यूएई, बहराइन र साउदी अरेबियालाई सहआयोजकका रूपमा लिएर सहभागी संख्या बढाउने फिफाको योजना गल्फ राष्ट्रबीच चिसिएको सम्बन्धका कारण विफल भएको हो ।

कुवेतले आयोजनाको इच्छा देखाए पनि त्यहाँको रंगशाला निर्माण र तयारीको लागि समय अभाव हुने निष्कर्ष पनि फिफाले निकालको छ । तर ओमानले आयोजना गर्ने इच्छा नै देखाएन । विश्व कपमा सहभागी संख्या बढाउँदा एसिया, अफ्रिकालगायत साना देशहरूले पनि विश्वकपमा सहभागिता जनाउने मौका पाउने विश्लेषण गरिएको थियो ।

तर, युरोेपेली फुटबल महासंघ (यूईएफए)का अध्यक्ष अलेकजेन्डर सेफेरिनले भने कतार विश्वकपमा सहभागी संख्या बढाउने विषयको विरोध गर्दै आएका थिए । सन् २०२६ को विश्वकपमा भने सहभागी देश ४८ नै हुनेछ । सन् २०१८ को रुस विश्वकपका क्रममा भएको फिफा कंग्रेसले सन् २०२६ को विश्वकपमा ४८ टोलीको सहभागिता पक्का गरेको थियो । उक्त कंग्रेसमा भएको निर्वाचनबाट विश्वकप आयोजनाको अधिकार अमेरिका, क्यानडा र मेक्सिकोले पाएका थिए ।