एजेन्सी - अमेरिकी राष्ट्रपति डोनाल्ड ट्रम्पले भेनेजुएलाको सेनालाई विपक्षी नेता हुवाँ ग्वाइदोलाई समर्थन गर्न चेतावनी दिएका छन्। अन्यथा सबै गुमाउन तयार रहन पनि उनले भनेका छन्।

राष्ट्रपति निकोलास मादुरोले अत्यावश्यक मानवीय सहायता बहिष्कार गरेपछि भेनेजुएलामा संकट बढेको छ।

ग्वाइदोले गत वर्ष मादुरोले गराएको आमनिर्वाचनलाई फर्जी बताउँदै आएका छन्। उनले गत महिना आफैंलाई अन्तरिम राष्ट्रपति घोषणा गरेका थिए।

उनको कदमलाई करिब ६० देशले समर्थन गरिसकेका छन्। ती देशले भेनेजुएलामा अत्यावश्यक सामग्री पठाएका थिए। मादुरो सरकारले सहायता सामग्री आफ्नो देशमा प्रवेश गर्न रोक लगाएको छ।

आफ्नो देश गरिबको देश नभएको दाबी गर्दै कसैको भीख आवश्यक नभएको मादुरोको भनाइ छ। उनीहरूले अत्यावश्यक सहायता सामग्री स्वीकार गर्न शनिवारसम्मको समयसीमा दिएका थिए।

अमेरिकी नेतृत्वमा पठाइएको उक्त सामान कोलम्बियाको कुकुतामा रोकिएको छ। भेनेजुएलामा उच्च मुद्रास्फीतिले अत्यावश्यक सामग्रीको अप्राप्य भएको छ। भोजन एवं औषधि अभावमा लाखौं मानिस पीडित छन्।

हाल मादुरोले अमेरिकाले पठाएको खाद्यान्न सडेको र संक्रमित भएको आरोप लगाएका छन्। उनले भेनेजुएलामा अराजकता र संकट अमेरिकाले निम्त्याएको दाबी गरे।

मियामीमा भेनेजुएलाका निर्वासित नागरिकलाई सम्बोधन गर्दै ट्रम्पले यस्तो बताएका हुन्। ट्रम्पले भने, ‘दैनिक विश्वको नजर तपाईंमाथि छ।’

उनले मादुरोसँग अब विकल्प बाँकी नरहेको पनि बताए। आफू, परिवार र देशवासीका साथ शान्तिपूर्वक बाँच्न ग्वाइदोको माफी प्रस्ताव स्वीकार गर्नुपर्नेमा उनले जोड दिए।

उनले भेनेजुएलाली सैनिकलाई सम्बोधन गर्दै भने, ‘यदि तपाईंहरूले मादुरोलाई समर्थन जारी राख्नु हुन्छ भने कहीँ पनि सुरक्षित आश्रय पाउनु हुनेछैन। तपाईंहरूले सबै गुमाउनु हुनेछ।’

मनवीय सहायता वितरण गर्न ग्वाइदोले १० लाख स्वयंसेवीलाई तयार रहन आदेश दिएका छन्। ६ लाख व्यक्तिले स्वयंसेवकलाई लागि नाम दर्ता गराएका छन्।