काठमाडौं - नेकपा स्थायी समिति बैठक शनिबार (२९ मंसिर)का लागि तय भएको छ । यसपालिको बैठक भने धुम्बाराहीस्थित पार्टी केन्द्रीय कार्यालयमा बस्ने नेकपाका प्रबक्ता नारायण काजि श्रेष्ठले जानकारी दिए ।

यस अघिका बैठकहरु प्रधानमन्त्री निवास बालुवाटारमा बस्ने गरेका थिए । पार्टी कार्यालयमा पार्टीको बैठक बस्न लागेको यो पहिलो पटक हो ।

पार्टी केन्द्रीय कार्यालयका सचिव कृष्णगोपाल श्रेष्ठका अनुसार, स्थायी समितिको बैठक शनिबार दिउसो १ बजे धुम्बाराहीस्थित केन्द्रीय कार्यालयमा बस्ने निश्चित भएको छ। यसअघि स्थायी समिति, केन्द्रीय सचिवालय र केन्द्रीय कमिटीको बैठक बालुवाटारमै हुँदै आएका थिए ।

२२ मंसिरमा चार नेताहरु माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठले नेताहरु बोलाएको समयमा उपस्थित नभएको भन्दै बैठक बहिस्कार गरेका थिए । उनीहरुले बालुवाटारमा बैठक डाकिने गरेकोमा पनि आपत्ती जनाएका थिए ।

उनीहरुको बहिस्कारपछि बसेको सचिवायलका पाँच सदस्यको बैठकले २९ मंसिरका लागि स्थायी समितिको बैठक तय गरेको थियो। बहिस्कार गरेका नेताहरुले पार्टी बैठक नियमित रुपमा आयोजना हुनुपर्ने, निर्धारित समयमा बैठक सुरु गर्नुपर्ने र पार्टी केन्द्रीय कार्यालयमा नै बैठक आयोजना हुनुपर्ने उनीहरुको माग थियो।

उनीहरुको मागको सुनवाई गर्दै अध्यक्षद्वय ओली र प्रचण्डले पार्टी केन्द्रीय कार्यालयमा नै बैठक आयोजना गरेका हुन्। शनिबार १ बजेभित्र बैठकका लागि अनिवार्य उपस्थित हुन स्थायी समिति सदस्यहरुलाई केन्द्रीय कार्यालयको तर्फबाट भनिएको छ।