काठमाडौं - यसै महिना आयोजना हुने एसियाली क्रिकेट काउन्सिल (एसीसी) यू-१९ एसिया कप क्रिकेट प्रतियोगिताका लागि मंगलबार १५ सदस्यीय नेपाली टोलीको घोषणा गरिएको छ। प्रतियोगिता असोज १३ देखि २१ गतेसम्म बंगलादेशमा आयोजना हुँदैछ। महमद आसिफ शेखको कप्तानीमा घोषित नेपाली टोलीको उपकप्तानमा कमलसिंह ऐरी रहेका छन्।

घोषित टोलीमा रोहितकुमार पौडेल, रवि शाह, नन्दन यादव, रीत गौतम, पवन सर्राफ, रवीन्द्रजंग शाही र रसिद खानलाई समावेश गरिएको छ। यसैगरी भीम सार्की, तृतराज दास, सन्दीप जोरा, सागर ढकाल, अरुण ऐरी र सूर्य तामाङले पनि टोलीमा स्थान पाएका छन्। नेपाली टोलीको प्रमुख प्रशिक्षकमा विनोदकुमार दास र सहायक प्रशिक्षकमा मनोज कटुवाल रहेका छन्।

यसैगरी व्यवस्थापकको भूमिका शक्ति गौचनले निर्वाह गर्नेछन् भने फिजियोको भूमिकामा विक्रम न्यौपाने रहेका छन्। यू-१९ टोलीका प्रमुख प्रशिक्षक दासको नेतृत्वमा रहेको छनोट समितिले टोलीको चयन गरेको हो। छनोट समितिको सदस्यमा सुनोज भट्टराई र राजु खड्का रहेका थिए। प्रतियोगितामा सहभागी हुन नेपाली टोली असोज ११ गते बंगलादेश प्रस्थान गर्ने कार्यक्रम छ।