कांग्रेसद्वारा सरकारविरुद्ध आन्दोलनको घोषणा

2018-07-19

काठमाडौँ - प्रमुख प्रतिपक्षी कांग्रेसले सरकारविरुद्ध सडक र सदनमा आन्दोलन घोषणा गरेको छ । मंगलबार सडक आन्दोलनका कार्यक्रम घोषणा गरेको कांग्रेसले अब संघीय र प्रदेश संसद् पनि अवरुद्ध गर्ने निर्णय गरेको हो ।

चिकित्सा शिक्षा विधेयक दर्ताको विरोधमा प्रतिनिधिसभाको बैठक अवरुद्ध गर्दै आएको कांग्रेसले अब राष्ट्रिय सभा र सबै प्रदेश सभा बैठक पनि अवरुद्ध गर्ने घोषणा बुधबारको पदाधिकारी बैठकले गरेको हो । डा. गोविन्द केसीको माग तथा एउटै पार्टीका सभामुख र उपसभामुखको मुद्दालाई सदनमा चर्काउने कांग्रेसको निष्कर्ष छ ।

‘चिकित्सा शिक्षा विधेयक अध्यादेशबमोजिम ल्याउन, आमरण अनशनमा बसेका डा. गोविन्द केसीसँग वार्ता गरी उनका माग पूरा गरेर जीवन रक्षा गर्न, संविधानबमोजिम सभामुख र उपसभामुख फरक दलको हुने व्यवस्थालाई कार्यान्वयन गर्न संघीय संसद् र सबै प्रदेश सभा अवरुद्ध गर्ने निर्णय बैठकले ग¥यो,’ नेता सुरेन्द्र पाण्डेले नयाँ पत्रिकासँग भने, ‘सडक संघर्षका कार्यक्रम यसअघि नै सार्वजनिक भइसकेका छन् । हामीले उठाएका मुद्दा सम्बोधन नहुँदासम्म सडक र सदनमा गरिने आन्दोलनका कार्यक्रम रोकिन्न ।’

कांग्रेसले डा. केसीको माग पूरा गरी जीवन रक्षा गर्न र चिकित्सा शिक्षा विधेयक कांग्रेस नेतृत्वको सरकारले ल्याएको अध्यादेशबमोजिम नल्याएको भन्दै संघीय संसद्अन्तर्गतको प्रतिनिधिसभा अवरुद्ध गर्दै आएको छ । संसद्को सञ्चालन नियमावलीमा कुनै सांसदले सदनको कारबाही अगाडि बढिरहेका वेला उभिएमा विरोध गरेको मानिन्छ ।

कांग्रेसका सांसदहरूले एक सातादेखि यही शैलीले विरोध गर्दै आएका छन् । अब यस्तो विरोध राष्ट्रिय सभा र सातवटै प्रदेश सभामा पनि गरिने पाण्डेले बताए । प्रधानमन्त्री केपी ओली बिहीबार गण्डकी प्रदेश सभाको अधिवेशनलाई सम्बोधन गर्न पोखरा जाँदै छन् । कांग्रेसले सदन अवरुद्ध गर्ने निर्णय गरेको छ ।

कांग्रेसले विभिन्न भ्रातृसंस्थाको अगुवाइमा बिहीबारबाट एक हप्ताका लागि आन्दोलनका कार्यक्रम घोषणा मंगलबार नै गरेको थियो ।

विधान मस्यौदा समितिमा सहमति
बैठकमा पार्टीको विधान मस्यौदा समिति गठनमा सहमति जुटेको छ । महामन्त्री पूर्णबहादुर खड्काको नेतृत्वमा बन्ने मस्यौदा समिति नौ सदस्यीय बनाउने र संस्थापन पक्षबाट ४ र नेता रामचन्द्र पौडेल पक्षबाट ४ सदस्य राखेर समिति बनाउने सहमति बनेको हो । बैठकमा नेता पौडेलले मस्यौदा समितिमा छलफल गरेर नाम दिने बताएका थिए । विधान परिवर्तन हुन नसक्दा कांग्रेसले पार्टीको संरचनालाई संघीय ढाँचामा परिवर्तन गर्न सकेको छैन ।

त्यस्तै नयाँ तोकिएका प्रतिनिधिसभा र प्रदेश सभाका निर्वाचन क्षेत्र तथा स्थानीय तहअनुरूपका पार्टीका संरचना विधान परिवर्तन नभएकाले बनाउन सकेको छैन । विधान मस्यौदा समितिले मस्यौदा तयार गरेपछि मात्रै विधान संशोधनका लागि महासमिति बैठक बोलाउने तयारी कांग्रेस नेतृत्वको छ । विधानको मस्यौदा तयार गर्न दुई महिना लाग्ने भएकाले महासमिति बैठक असोज पहिलो साता मात्रै बस्न सम्भव हुने नेताहरू बताउँछन् ।

नेविसंघको विवाद मिलाउने जिम्मा निर्देशन समितिलाई
पार्टीको प्रमुख भ्रातृसंस्था नेपाल विद्यार्थी संघमा देखिएको विवाद मिलाउन बैठकले निर्देशन समितिलाई जिम्मा दिएको छ । बिहीबार नै दुवै पक्षको बैठक बोलाएर तत्काल समस्याको समाधान खोज्न बैठकले निर्देशन दिएको प्रवक्ता विश्वप्रकाश शर्माले जानकारी दिए । कांग्रेसले डा. प्रकाशशरण महतको नेतृत्वमा केन्द्रीय सदस्यहरू किशोरसिंह राठोर, गोविन्द भट्टराई, गुरुराज घिमिरे र प्रदीप पौडेल सदस्य रहेको निर्देशन समिति बनाएको थियो ।

नेविसंघमा अध्यक्ष नैनसिंह महर र उपाध्यक्ष प्रकाश रानाले फरक–फरक गुट चलाउँदै आफूखुसी बैठक बसेर निर्णय गर्दै आएका छन् । बैठकले दुवै पक्षले विधानविपरीत गरेका निर्णय सच्याउने र विधानविपरीत काम गर्नेलाई कारबाही गर्नसमेत निर्देशन समितिलाई निर्देशन दिएको छ । नेविसंघमा १ सय २८ सदस्यीय निर्वाचित केन्द्रीय समितिमा उपाध्यक्ष राना पक्ष बहुमतमा छन् भने अध्यक्ष नैनसिंह महर अल्पमतमा छन् । अत्पमतमा रहेका अध्यक्ष महरले आफूखुसी निर्णय गरेपछि राना पक्षको बहुमत केन्द्रीय सदस्यको उपस्थितिमा बसेको बैठकले खारेज गरिदिएको थियो ।

 

नयाँ पत्रिका




थप समाचार


‘अध्यादेशमार्फत विधेयक टुंगो लगाउँछौँ’

‘अध्यादेशमार्फत विधेयक टुंगो लगाउँछौँ’

चिकित्सा शिक्षासम्बन्धी विधेयक पारित नहुँदै व्यवस्थापिका संसद्को कार्यकाल सकिएपछि उक्त विधेयकलाई अब अध्यादेशमार्फत टुंगो लगाइने एकजना मन्त्रीले बताएका छन्। संसद अस्तित्वमा नरहेपनि विधेयक पारित गराउन ...

२९ पछि लोकतान्त्रिक गठबन्धन घोषणा

२९ पछि लोकतान्त्रिक गठबन्धन घोषणा

निर्वाचन आयोगले तोकेको बन्दसूचीका उम्मेदवारको नाम पेस गर्ने समयसीमा पछि लोकतान्त्रिक गठबन्धनको घोषणा गरिने भएको छ । आयोगले २९ असोजसम्मका लागि समानुपातिकका उम्मेदवारको नाम पठाउने ...

त्रिशूलीमा खस्दा ट्रकसहित चालक बेपत्ता

त्रिशूलीमा खस्दा ट्रकसहित चालक बेपत्ता

मलेखु (धादिङ), साउन १२ । पृथ्वी राजमार्गअन्तर्गत गजुरी गाउँपालिका–२ बिहानी पम्प नजिकैबाट आज बिहान एउटा ट्रक त्रिशूली नदीमा खसेर बेपत्ता भएको छ । जिल्ला ट्राफिक ...




ट्रेन्डिङ