पोखरा - क्षेत्रफलका हिसाबले देशकै सबैभन्दा ठूलो महानगर पोखरा लेखनाथ महानगरपालिकाले आगामी आर्थिक वर्ष ०७५\०७६ का लागि ५ अर्ब ६५ करोडको बजेट ल्याउने भएको छ । महानगरपालिकाका प्रमुख प्रशासकीय अधिकृत शेषनारायण पौडलले केन्द्र सरकार, प्रदेश सरकारबाट आउने विभिन्न प्रकारका अनुदान, आन्तरिक स्रोत र राजस्वमार्फत प्राप्त हुने रकमबाट बजेटको व्यवस्थापन हुने बताए ।

संघीय सरकारबाट उपलब्ध हुने ससर्त अनुदान १ अर्ब २० करोड ४२ लाख, समानीकरण अनुदान ६१ करोड ४४ लाख, प्रदेश सरकारबाट प्राप्त हुने ससर्त अनुदान २ करोड ७४ लाख, राजस्व बाँडफाँडबाट प्राप्त रकम, एकीकृत सम्पत्ति कर, घरबहाल कर, विज्ञापन, कवाडी निकासी र घरजग्गा रजिस्ट्रेसनलगायत स्रोतबाट रकम जुटाइने महानगरका कर शाखा प्रमुख छवि शर्माले बताए ।

महानगरका प्राथमिकता
महानगरपालिकाको तेस्रो नगर सभा १० असारमा सुरु हुँदै छ । नगर सभामा प्रस्तुत गर्ने नीति, कार्यक्रम, योजना र बजेटको तयारीका क्रममा महानगर छ । महानगरको आगामी नीति तथा कार्यक्रममा स्मार्ट सिटीका लागि पूर्वाधार निर्माण, महानगरपालिका र कार्यालयको भौतिक सुधार, विद्युतीय सुशासन, भौतिक पूर्वाधार, कृषिको आधुनिकीकरण, विद्युतीय तार अन्डरग्राउन्ड, मोनोरेलमार्फत सात ताल जोड्ने योजना र फोहोरमैला व्यवस्थापनलगायत योजना प्राथमिकतामा पर्ने पौडेलले जानकारी दिए ।

पौडेलका अनुसार विभिन्न पाँचवटा समिति बनाएर नीति, कार्यक्रम र बजेट निर्माणको काम भइरहेको छ । महानगर सभा पोखरा सभागृहमा हुने वरिष्ठ कानुन अधिकृत नारायण शर्माले जानकारी दिए ।

मेयरद्वारा सुझाब माग
मेयर मानबहादुर जिसी ‘स्मार्ट सिटी’ बनाउने घोषणा गरेरै निर्वाचनमा होमिएका थिए । १ वर्षको कार्यकाल आशातीत सफल बन्न नसकेको उनी बताउँछन् । कानुन र जनशक्ति अभाव तथा भएका जनशक्ति पनि क्षमतावान् नहुँदा काम गर्न नसकिएको उनले बताएका छन् ।

महानगर तेस्रो महानगर सभाको तयारीमा छ । यही तयारीका क्रममा मेयर जिसीले बुधबार कास्कीबाट संघीय संसद् र प्रदेश संसद्मा प्रतिनिधित्व गर्ने सांसदसँग अब महानगरले लिने नीति तथा कार्यक्रममा समावेश गर्नुपर्ने विषयमा सुझाब मागेका छन् ।

सांसदले विगतमा मेयर जिसीले निर्वाचनका वेला जनतासँग गरेका प्रतिबद्धता, पार्टीको घोषणापत्रमा उल्लेख भएका विषयवस्तु सबैलाई ध्यान दिन आग्रह गरे । उनीहरूले स्मार्ट सिटीको पूर्वाधारलाई प्राथमिकता दिएर नीति, कार्यक्रम, योजना र बजेट बनाउन सुझाब दिए ।

सांसदका सुझाब

संघीय सभाका सांसद खगराज अधिकारी
विजयपुर खोलामा पुल थप्नुपर्छ र चौडाइ ४ लेनको बनाउनुपर्छ । बाइपास सडक बनाएर पोखराको ट्राफिक जामलाई घटाउने योजना महानगरपालिकाले ल्याउनुपर्छ ।

प्रदेश सांसद कृष्ण थापा
चुनावी घोषणापत्रमा समेटिएका योजनालाई पूरा गर्ने गरी बजेट ल्याउनुपर्छ । पोखराका डाँडाकाँडालाई ग्रिन सिटीका रूपमा विकास गर्नुपर्छ ।

प्रदेश सांसद दीपक कोइराला
साबिकको लेखनाथ नगरपालिकाका बासिन्दालाई महानगरको अनुभूति हुने गरी योजना ल्याउनुपर्छ । तालहरूको संरक्षणका लागि गुुरुयोजना आवश्यक छ ।

प्रदेश सांसद मनबहादुर गुरुङ
विजयपुरको किनारैकिनार सडक बनाउनुपर्छ । पोखरालाई पर्यटकीय गन्तव्यका रूपमा विकास गर्नुपर्छ ।

प्रदेश सांसद विन्दुकुमार थापा
पोखराले भू–उपयोगर जल–उपयोग नीति ल्याउनुपर्छ ।

सार्वजनिक जग्गाको संरक्षण गर्नुपर्छ ।

नयाँ पत्रिका