काठमाडाैं - ८ महिना अघिदेखि एकताको बारेमा छलफल गरेका नेकपा एमाले र नेकपा माओवादी केन्द्रबीचको एकता तत्काललाई टरेको छ । पछिल्लो समय एकता प्रक्रिया अघि बढाउनेबारे दुवै पार्टीका प्रमुख नेताहरुबीच कुनै छलफल हुन सकेका छैनन् ।

दुवै पार्टीका अध्यक्षद्धय केपी शर्मा ओली र पुष्पकमल दाहाल प्रचण्डबीच एकताको विषयमा अहिले केही मतभिन्नताहरु रहेको स्रोतको दाबी छ । प्रचण्डले एमालेसँग सम्मानजनक र समानताको आधारमा एकता हुनुपर्ने अडान राखेका छन् । तर एमालेले उक्त कुरा स्वीकार गरेको छैन ।

केहि दिनअघि देखि माअोवादी र एमाले नेताहरूको घोचपेच पनि शुरू हुन थालेको छ । केहिदिन अघि भारतीय प्रधानमन्त्री नरेन्द्र मोदी नेपाल भ्रमणमा अाउँदा भएको कार्यक्रममा पनि माअोवादीबाट सरकारमा सहभागी मन्त्रीहरूलार्इ उपस्थित गराइएको थिएन । अझ अरूण जलविद्युत अायोजनाको उदघाटन कार्यक्रममासमेत माअोवादीका उर्जा तथा जलस्रोत मन्त्री बर्षमान पुनलाइ जानकारी नदिएको दिएको समाचार सार्वजनिक भइसकेको छ । पछिल्लो समय बजेटमासमेत अोलीले एकलाैटी गर्न खोजेको माअोवादीका नेताहरूको अारोप छ ।

माअोवादीबाट सहभागी मन्त्रीहरूले पार्टी अध्यक्ष प्रचण्डलाइ अोलीसँग एक पटक कुरा गर्न सुझाएका छन् । अोलीले जसरी पनि एकलाैटी निर्णय गर्दै अाएको माअोवादीबाट सहभागी एक मन्त्रीले जानकारी दिए ।

एमाले अध्यक्ष ओलीले एकता महाधिवेशनपछि अध्यक्षमा माधव कुमार नेपाललाई उठाउने तयारी गरेसँगै प्रचण्डले ओलीसँग असन्तुष्टी पोखेको स्रोतले बतायो । प्रचण्डले एकतापछिको कि अध्यक्ष कि प्रधानमन्त्री माअोवादीलार्इ दिनुपर्ने बताइरहेका छन् । प्रधानमन्त्रीमा ओलापालो र एकता महाधिवेशनसम्म दुवै जना अध्यक्ष रहनुपर्ने प्रचण्डको अडान छ । तर, यसमा ओली भने सहमत हुन सकेका छैनन् ।

प्रचण्ड अध्यक्ष वा प्रधानमन्त्रीमध्ये कुनै एक पद आफूलाई सुरक्षित नभएसम्म एकता गर्ने पक्षमा छैनन् । दुवै दलका नेताहरुले एकताको मिति तोक्दै आएका छन् । तर, उनीहरुले सार्वजनिक गरेको एकता गर्ने भनिएका मितिहरु त्यतिकै गुज्रिँदै आएका छन् ।

खबरडबली बाट