काठमाडौं - शनिबार बेलुकी बझाङको खप्तडछान्न गाउँपालिका–६ पाटादेवल गाउँ आसपास केन्द्र बनाएर भुकम्प गएपछि प्रहरीले स्थानीयलाई घरबाहिरै बस्न आग्रह गरेको छ।

भूकम्पको धक्काले घरहरु चर्किरहेको र भत्किने जोखिम रहेकाले स्थानीयलाई घर बाहिरै बस्न भनिएको जिल्ला प्रहरी कार्यालय बझाङले जानकारी दिएको छ। पाटादेवल प्रहरी चौकीका प्रहरी सहायक निरीक्षक (असई) रामबहादुर बमले स्थानीयलाई घर बाहिरै बस्न भनेर माइकिङ गर्न थालिएको बताए।

‘गत मंगलबार राति (बुधबार बिहान) आएको भूकम्पले चर्किएका घर शनिबारको भूकम्पले थप चर्किएपछि घरहरु भत्किने जोखिम बढेको छ। यस्तो अवस्थामा घरभित्र बस्नु झन् जोखिमपूर्ण हुने भएकाले बाहिरै बस्न भनेर माइकिङ गर्न थालेका छौं,’ असई बमले भने।

शनिबार बेलुकी ८ बजेर १२ मिनेटतिर पाटादेवल गाउँ आसपास केन्द्र बनाएर गएको ५.४ रेक्टस्केलको भूकम्प गएको थियो। भूकम्पपछि स्थानीयहरु रातभरी घर बाहिरै आगो तापेर बसेका थिए।

यसअघि बुधबार बिहान डोटी जिल्लाअन्तर्गत खप्तड राष्ट्रिय निकुञ्ज क्षेत्रलाई केन्द्र बनाएर गएको भूकम्पले डोटीमा ६ जनाको मृत्यु भएको थियो।

बुधबार बिहान २ बजेर १२ मिनेटमा खप्तड राष्ट्रिय निकुञ्ज केन्द्र बनाएर गएको ६.६ रेक्टरस्केलको भूकम्पको धक्का सुदूरपश्चिमका पहाडी जिल्लासँगै भारतसम्म पनि महसुस भएको थियो।

भूकम्पको धक्काले डोटी र बझाङमा घरहरु चर्किएका थिए। बुधबारको भूकम्पले चर्किएका घरहरु शनिबारको भूकम्पले झन् चर्किँदा जोखिम बढेको हो।