काठमाडाैं - जापानमा हुने ३२औं ग्रीष्मकालीन ओलम्पिक खेलकुदको औपचारिक उद्घाटन आज हुँदै छ।

जापानको राजधानी टोकियोमा एक विशेष कार्यक्रमबीच टोकियो ओलम्पिक औपचारिक रुपमा सुरु हुनेछ। नेपाली समय अनुसार दिउँसो ४ बजेपछि हुने उद्घाटन समारोहको मार्च पासमा नेपालको झण्डा पौडी खेलाडी गौरिका सिंह र एलेक्जेन्डर शाह (एलेक्स) ले बोक्ने छन्।

टोकियो ओलम्पिकमा सहभागिता जनाउन विश्वभरका खेलाडी, प्रशिक्षक र अफिसियल जापान पुगिसकेका छन्।

नेपालबाट खेलाडीसहित २३ सदस्यीय टोली टोकियो पुगिसकेको छ। कोरोनाको असर नपरोस् भन्नका लागि स्वास्थ्य र सुरक्षामा विशेष जोड दिइएको छ।

गत वर्ष नै आयोजना हुनुपर्ने प्रतियोगिता कोरोनाका कारण रोकिएको थियो। कोरोना भाइरसको सङ्क्रमणका कारण यसपटक दर्शकको उपस्थितिबिना नै प्रतियोगिता हुने आयोजकले जनाएको छ।