कविता : बलेको आगो !

2021-07-19
नारायण शर्मा

बलकै आगो ताप्छन् सबैले !
निभेको वा निभ्नै लागेकोलाई त
पानी नै खन्याएर निभाउँछन् तिनैले !तर विडम्बना,
आफू बडो कर्मठ र कर्तब्यनिष्ठ करार गर्छन् आफूलाई आफै तिनैले !
अझ त्यागी, तपस्वी, तेजस्वी र यशस्वी
समेत दावी गर्छन् आफै तिनैले !
अनि आफूलाई निकै जान्नेसुन्ने र अगुवापछुवा ठान्ने-भन्नेले पनि
तिनै कथित त्यागी, तपस्वीलाई हाई हाई गर्छन्
र निभेको आगोलाई बाल्न खोज्नेहरुलाई नै
उल्लू ठान्छन्,
जोकर सम्झन्छन्
र मूर्ख नै करार गरिदिन्छन् !
तर साँच्चिकै मूर्खलाई,
असली उल्लूलाई
र वास्तविक जोकरलाई भने
भगवान ठानिदिन्छन्,
नायक-महानायक भनिदिन्छन्
र बार-बार तिनको पूजा, प्रशंसा, प्रमोसन र पदस्थापनमा भजन पनि गाइदिन्छन् !
अनि आफूलाई
हनुमान, गणेश र दलालहरुमा परिणत गरेर बादशाहको पछि-पछि लावालस्कर लागेर जयजयकार गरिदिन्छन् !

किनकी ती वादशाहहरुले कुरा मीठा गर्छन् र राम्रा पनि गर्छन्,
चिल्ला गर्छन् र चर्का पनि गर्छन्,
ठुला गर्छन् र प्रतिबद्धता पनि गर्छन्
र तर्क, वितर्क, कुतर्क गरेर भ्रमित र चकित पनि पार्छन्
अनि कथित तथ्यांक-मिथ्यांक प्रस्तुत गरेर
मोहित नै पार्ने गर्छन्
तर काम भने उल्टा गर्छन्
विकृत र विसङ्गत गर्छन्
तथापि तिनीहरुकै बोलीमा लोली मिलाउँदै
सोझा भक्तजनहरु,
इमान्दार अनुयायीहरु,
तिनैलाई चन्द्रमा ठानेर आफूलाई चकोर बनाइदिन्छन्
तिनैलाई देवता र राजा-महाराजाहरु मानेर
भक्ती-स्तुति, मानसम्मान र शानशौकत
समर्पण गर्छन् !
र तिनै ढाँट र धूर्तहरु नै
तिनै छलीकपटीहरु नै
तिनै ढोंगीपाखन्डीहरु नै
कुरो र कुलोलाई जता पनि मोड्न सक्छन् !
त्यसैले त यहाँ चोरलाई चौतारी चढाइन्छ र साधुलाई शूली चढाइन्छ
र दुष्टको प्रशस्ती गाइन्छ
र इष्टको धज्जी उडाइन्छ !
यसैलाई न्याय, समानता र स्वतन्त्रताको दुहाइ दिइन्छ !
यसैलाई जनवाद र जनतन्त्रको जामा पहिर्‍याइन्छ
र लोकतन्त्र विधिको शासनको उपमा भिराइन्छ !

यसैमा तिनै ढाँट र धूर्तहरुले,
तिनै ढोंगी र पाखण्डीहरुले,
तिनै छली र कपटीहरुले,
तिनै जाली र झेलीहरुले,
तिनै स्वार्थी र षड्यन्त्रकारीहरुले
अर्थात् तिनै भ्रष्ट, दुष्ट र निकृष्टहरुले नै
उल्टै आफू नै
महा ज्ञानी-दानी भएको,
त्यागी-तपस्वी ऋषि-महर्षी भएको,
असल र सफल सन्त-महन्त भएको
र महान् भगवान् भएको दावी गर्छन् !
तर विडम्बना !
त्यही दावीलाई
हामी पत्याइदिन्छौं
र तिनकै वरिपरि
प्रदक्षिणा गर्छौं र दानदक्षिणा दिन्छौं
अनि त्यसैमा आत्मरती र आत्मसंतुष्टी गर्छौं
र त्यसरी नै मुक्ती र मोक्ष प्राप्त गर्नेमा आश्वस्त-विश्वस्त हुन्छौं !

अझ त्यति मात्र होइन,
निभेको आगो बाल्न खोज्नेहरुलाई उल्टै
नोकर, भोंकर र जोकर बनाएर
अबूझ, असक्षम र असफल ठहराएर
हेप्छन्, चेप्छन् र खिसीट्युरी गर्छन्
हँसीमजाक गर्छन् र हाँसोमा उडाउँछन् मानिसहरु !
तर आफूहरु सफल र असल भएकोमा गर्वले पाहा फुलेझैं फुल्छन् तिनीहरु
र फुल्दाफुल्दै कतिबेला बड्याङ्ग फुट्छन् त्यो भने पत्तै पाउँदैनन् उनीहरु !

तैपनी तिनै पाहाहरुका ट्वाँहा-ट्वाँहालाई आहा-आहा-आहा भन्दै
विचार-आचार, नीति-नैतिकता
र कर्तव्य-सर्तब्य सबै भुलेर
बलेकै आगो ताप्छन् सबैले !
तर निभेको वा निभ्नै लागेको आगोलाई बाल्दैनन् कसैले !
तर बलेको आगो ताप्नु भनेको
अल्छिपन हो र कामचोरी हो !
लाछीपन हो र लाचारी हो !!
लम्फू हुनु हो र लम्पट हुनु हो !!!
र यसरी बलेको आगो ताप्दाताप्दै
लेण्डुपपथमा पुग्ने खतरा मोल्नु पनि हो !!!!
***




थप समाचार


‘अध्यादेशमार्फत विधेयक टुंगो लगाउँछौँ’

‘अध्यादेशमार्फत विधेयक टुंगो लगाउँछौँ’

चिकित्सा शिक्षासम्बन्धी विधेयक पारित नहुँदै व्यवस्थापिका संसद्को कार्यकाल सकिएपछि उक्त विधेयकलाई अब अध्यादेशमार्फत टुंगो लगाइने एकजना मन्त्रीले बताएका छन्। संसद अस्तित्वमा नरहेपनि विधेयक पारित गराउन ...

२९ पछि लोकतान्त्रिक गठबन्धन घोषणा

२९ पछि लोकतान्त्रिक गठबन्धन घोषणा

निर्वाचन आयोगले तोकेको बन्दसूचीका उम्मेदवारको नाम पेस गर्ने समयसीमा पछि लोकतान्त्रिक गठबन्धनको घोषणा गरिने भएको छ । आयोगले २९ असोजसम्मका लागि समानुपातिकका उम्मेदवारको नाम पठाउने ...

त्रिशूलीमा खस्दा ट्रकसहित चालक बेपत्ता

त्रिशूलीमा खस्दा ट्रकसहित चालक बेपत्ता

मलेखु (धादिङ), साउन १२ । पृथ्वी राजमार्गअन्तर्गत गजुरी गाउँपालिका–२ बिहानी पम्प नजिकैबाट आज बिहान एउटा ट्रक त्रिशूली नदीमा खसेर बेपत्ता भएको छ । जिल्ला ट्राफिक ...




ट्रेन्डिङ