काठमाडौं - प्रधानमन्त्री केपी शर्मा ओलीले प्रतिनिधिसभामा विश्वासको मत गुमाएका छन्। योसंगै उनि पदमुक्त भएका छन् ।

सोमबार प्रतिनिधि सभामा विश्वासको मतका लागि प्रधानमन्त्री ओलीले पेश गरेको प्रस्ताव असफल भएपछी ओली नेतृत्वको सरकार ढलेको हो ।

मतदानमा २३२ सांसद सहभागी थिए। प्रधानमन्त्रीको आफूप्रति विश्वास छ भन्ने प्रस्ताव पारित हुन हाल कायम रहेको २७१ सदस्यको बहुमत अर्थात् १३६ मत गर्न आवश्यक हुन्थ्यो ।

तर ओलीले जम्मा ९३ मत पाए भने प्रस्तावको विपक्षमा १२४ मत पर्यो ।

प्रस्तावको विपक्षमा नेपाली कांग्रेस, माओवादी केन्द्र र जसपाको उपेन्द्र यादव–बाबुराम भट्टराई पक्षले मत दिएका थिए।

पक्ष र विपक्षमा मत दिन्नँ भन्नेमा‍‍ १५ मत परेको छ। जसपाको महन्थ ठाकुर र राजेन्द्र महतो पक्षले यसमा मतदान गरेका थिए।

एमालेको माधवकुमार नेपाल पक्ष बैठकमा अनुपस्थित थिए। प्रस्ताव असफल भएसँगै प्रधानमन्त्री पदमुक्त हुने भएका छन्।

उनले सम्भवतः आजै राष्ट्रपतिसमक्ष राजीनामा दिनेछन्।