काठमाडौं - प्रधानमन्त्री केपी शर्मा ओलीले आफूले अर्का अध्यक्षसँग आधा-आधा स्वीकार्न जरुरी नभएपनि त्यसो गरेको बताएका छन्। एपी १ टेलिभिजनसँगको कुराकानीमा उनले आफूलाई प्रधानमन्त्री पाएको बदलामा तत्कालीन माओवादी केन्द्रले सभामुख पाएको बताएका छन्।

उनले भने, ‘शक्ति सन्तुलन र बाँडफाँड तत्कालीन नेकपा एमाले र माओवादी केन्द्रबीच समुचित रुपमा भएको थियो। प्रधानमन्त्री एउटाले लिने र अर्काले सभामुख लिने भनिएको थियो। मैले नै उदारताका साथ आधा–आधा समय चलाउन सकिन्छ भनेको हुँ।’ यही क्रममा राष्ट्रपति र उपराष्ट्रपति आदि पनि मिलाइएको उनको भनाइ थियो।

प्रचण्ड आफैंले उक्त जिम्मेवारी फिर्ता गरेको बताए। पार्टी एकताकै विषयमा मिलेका यी कुरामाथि वखेडा प्रचण्डले झिकेको उनले बताए। यसैगरी आफूले राष्ट्रियताका पक्षमा अडान लिइरहँदा त्यसले आफ्नै पार्टीका अरु नेतालाई समस्या परेको आरोप लगाए। भने, ‘मैले गुमेको भूमि फिर्ता लिन प्रयास गरिरहेको छु। अरु होइन, मेरै पार्टीका नेताहरुलाई समस्या परेको छ। भूमि फिर्ता ल्याइहाल्छ कि भन्ने डर छ।’

आफूले पार्टी फोड्छु भनेर भ्रम फैलाएको अरोप पनि उनले लगाए। पार्टी फुटाउने होइन, एकता आजको आवश्यकता भएको उनको भनाइ थियो।