काठमाडौं - इटालियन सिरि ए फुटबलको उपाधि युभेन्टसले जितेको छ। आइतबार राति भएको आफ्नो ३६ औं खेलमा साम्पडोरियालाई २-० गोलअन्तरले पराजित गर्दै युभेन्टसले उपाधि जितेको हो। दुई खेलअघि नै उपाधि जित्ने क्रममा युभेन्टसका लागि क्रिष्टियानो रोनाल्डो र फेडेरिको बेर्नान्डेस्कीले गोल गरे।

पहिलो हाफको अन्तिम समयमा रोनाल्डोले गोल गर्दै युभेन्टसलाई अग्रता दिलाए। उनकै गोलमा युभेन्टसले पहिलो हाफसम्म १–० गोलको अग्रता बनाएको थियो। खेलको ६७औं मिनेटमा फेडेरिकोले गोल गर्दै युभेन्टसलाई २-० गोलको जित दिलाए।

युभेन्टसले यो जितसँगै दुई खेल अघि नै इटालियन सिरि ए को उपाधि जितेको हो। लगातार नवौं पटक उपाधि जित्ने क्रममा युभेन्टसले ३६ खेलबाट ८३ अंक बनाएको छ। पराजित साम्पडोरिया भने समान खेलबाट ४१ अंक बनाउँदै लिगको १५ औं स्थानमा छ।

लिगको दोस्रो स्थानमा रहेको इन्टर मिलानको ३६ खेलबाट ७६ अंक हुँदा तेस्रो स्थानमा रहेको एटलान्टाको ३६ खेलबाट ७५ अंक छ।