काठमाडौं - सत्तारुढ नेपाल कम्युनिष्ट पार्टी (नेकपा)मा हलचल ल्याउने गरी निर्वाचन आयेगमा दर्ता भएको दल नेकपा एमालेकी अध्यक्ष मोरङकी भएको खुलेको छ। मंगलबार बसेको नेकपाको बैठकमा उनी झापाकी भएको र पार्टी अध्यक्ष तथा प्रधानमन्त्री केपी ओलीको निर्देशनमा नेकपा केन्द्रसँग एकिकरण भएको एमाले ब्युताउने प्रयास भएको भन्दै आलोचना भएको थियो।

तर दल दर्ताका लागि निर्वाचन आयोगमा पेश भएको विवरण अनुसार दलकी अध्यक्ष रहेकी सन्ध्या तिवारी मोरङको विराटनगर महानगरपालिका–६ की भएको खुलेको छ। असार १२ मा आयोगमा दल दर्ताका लागि महासचिव मनिषकुमार उपाध्यायले निवेदन दिएका थिए। दल दर्ताका लागि निवदेन दिने सूचीमा रामेछापको गेलु निवासी रेस्लर भगवती खड्का उपाध्यक्ष छिन्।

एमालेले आफ्नो छापमा डाँडामा उदाउँदो सूर्य राखेको छ। प्रस्तावित एमालेको केन्द्रीय कमिटीमा प्रायः युवा छन्। नयाँ दल दर्ताका लागि निवेदन दिइनुमा एमालेको डोमेन सुरक्षित गर्ने राजनीतिक ध्येय लुकेको हुन सक्ने नेकपाका नेताहरुको अनुमान छ। ओलीको विपक्षमा रहेका अध्यक्ष पुष्पकमल दाहाल, उपाध्यक्ष बामदेव गौतम लगायतकाले पारिआए पार्टी विभाजन गर्ने प्रधानमन्त्रीको रणनीति अनुसार एमाले नाममा पार्टी दर्ताको प्रक्रिया शुरु गरिएको दावी गरेका थिए। गौतमले स्थायी कमिटीको बैठकमा ओलीले नै सो नाममा पार्टी दर्ता गर्न लगाएको प्रमाण आफुसँग रहेको दावी समेत गरेका थिए।