काठमाडौँ - जनता समाजवादी पार्टीमा तीन जना अध्यक्ष रहने भएका छन्। वैशाख १० गते समाजवादी पार्टी नेपाल र राष्ट्रिय जनता पार्टी नेपालबीच एकता गर्ने सहमति भएको थियो ।

आइतबार दुबै पार्टीका शीर्ष नेताहरूबीच बालकुमारीस्थित पार्टी कार्यालयमा भएको छलफलमा तीन अध्यक्ष बनाएर पार्टी दर्ता गर्ने सहमति जुटेको हो। सहमति अनुसार पार्टीमा एक जना संघीय परिषद अध्यक्ष र दुई जना केन्द्रीय परिषद अध्यक्ष रहनेछन्।

संघीय परिषद अध्यक्षमा बाबुराम भट्टराई तथा केन्द्रीय परिषद अध्यक्षमा महन्थ ठाकुर र उपेन्द्र यादव रहने सहमति भएको छ ।

त्यस्तै पाँच जनाको पदाधिकारी बनाउने पनि सहमति भएको हो। जसमा ‘तीन जना अध्यक्ष र चौथो बरियतामा अशोक राई र पाँचौंमा राजेन्द्र महतो रहनुहुन्छ। राई र महतो वरिष्ठ नेता रहने सहमति छ,’ एक नेताले भने।

‘तीन अध्यक्षसहित पाँच पदाधिकारी र ५१ सदस्यीय केन्द्रीय समिति बनाउने गरी आयोगमा दल दर्ताका लागि जाने तयारी छ,’ ती नेताले भने, ‘अहिले पदाधिकारीको नाम मात्रै आयोगमा लैजाने तयारी छ।’

उक्त सहमतिलाई लिखित गर्न बाँकी रहेको ती नेताले बताए।