घोराही - दाङस्थित राप्ती स्वास्थ्य विज्ञान प्रतिष्ठानको बहिरंग (ओपीडी) सेवा बन्द गरिएको छ । प्रतिष्ठानमा कोरोना संक्रमित व्यक्तिहरुको उपचार सुरु हुने भएपछि ओपीडी सेवा बन्द गरिएको हो।

मंगलबार स्वास्थ्य तथा जनसंख्या मन्त्रालयले कोरोना संक्रमित व्यक्तिलाई भर्ना गरी उपचार गर्न प्रतिष्ठानलाई निर्देशन दिएको थियो । मन्त्रालयको सोही निर्देशनअनुसार बहिरंग सेवा बन्द गरिएको प्रतिष्ठानका का.मु. रजिष्ट्रार कैलाश देवले जानकारी दिए ।

प्रतिष्ठानले सूचना जारी गरी बहिरंग सेवा बन्द गरिएकाले अन्य बिरामीहरुलाई तुलसीपुर प्रादेशिक अस्पताल वा अरु कुनै स्वास्थ्य संस्थामा जान आग्रह गरेको छ । साथै आफ्नो आकस्मिक कक्ष तथा अन्य वार्डमा रहेका बिरामीहरुको व्यवस्थापन गरिदिन प्रतिष्ठानले तुलसीपुरस्थित प्रादेशिक अस्पताललाई भनेको छ ।

प्रतिष्ठानमा कोरोना परीक्षण ल्याबको समेत सुविधा छ । प्रतिष्ठानमा हाल १० वटा आईसीयू बेड छन् ।