काठमाडौं - भारतद्वारा अतिक्रमित भूमि समेटेर भूमि व्यवस्था मन्त्रालयले तयार पारेको नेपालको नयाँ नक्सालाई मन्त्रिपरिषद्ले स्विकृत गरेको छ । आइतबारको मन्त्रिपरिषद्‍मा भूमि व्यवस्था मन्त्री पद्मा अर्यालले प्रस्तुत गरेको नक्सा सोमबारको मन्त्रिपरिषद्‍ले पारित गरेको सरकारका प्रवक्तासमेत रहेका अर्थमन्त्री युवराज खतिवडाले बताए ।

‘कालपानी, लिपुलेक र लिम्यिाधुरा समेटेर नयाँ नक्सा पारित भएको छ,’ खतिवडाले भने ।

नयाँ नक्सामा भारतले अतिक्रमण गरेका नेपालका लिपुलेक, कालापानी र लिम्पियाधुरालाई समावेश गरिएको छ ।

नयाँ नक्सामा अन्तर्राष्ट्रिय सिमानाअन्तर्गत प्रदेश र स्थानीय तह समेत समावेश गरेर नक्सा ल्याइएको छ। यो नक्साअनुसार निशान छाप र सरकारी काम काजमा प्रयोग गरिने नक्सा तथा विद्यालयमा पढाइने नक्सा यसैअनुसार अद्यावधिक हुने सरकारका प्रवक्तासमेत रहेका अर्थमन्त्री युवराज खतिवडाले जानकारी दिए।