भर्ना विवादले नेपाल ल क्याम्पसको एक शैक्षिक वर्ष खेर गयो, नयाँ भर्नासमेत अन्योलमा !

2020-03-06

काठमाडौँ - भर्नाका विषयमा भएको विवादले त्रिभुवन विश्वविद्यालयको आंगिक क्याम्पस नेपाल ल क्याम्पसको एक शैक्षिक वर्ष समाप्त भएको छ । एलएलबी कार्यक्रममा कति विद्यार्थी भर्ना गर्ने भन्ने विषय नसुल्झिँदा अघिल्लो शैक्षिक वर्ष समाप्त भएको हो । यस वर्षको नयाँ भर्ना प्रक्रिया सुरु हुने वेलासम्म पनि के गर्ने भन्ने अन्योल छ ।

अघिल्लो शैक्षिक वर्षमा विद्यार्थीले खुला भर्ना गर्न दबाब दिने, त्रिवि केन्द्रीय कार्यालय अनिर्णीत हुने र क्याम्पस प्रशासनले क्षमता अभावले सबैलाई भर्ना गर्न नसक्ने अवस्था भएपछि विवाद उत्पन्न भएको हो । यही कारण भर्नाविनै एक शैक्षिक वर्ष समाप्त भएको हो । एलएलबीमा प्रतिवर्ष पाँच सय विद्यार्थीको क्षमता भएको क्याम्पसमा ०७४ मा १० हजार आठ सय ६३ भर्ना भएका थिए । विद्यार्थीको अत्यधिक चापकै कारण क्याम्पस प्रशासनले अघिल्लो वर्षदेखि प्रवेश परीक्षा सुरु गरेको थियो ।

यसरी सुरु भएको थियो विवाद
क्याम्पसले अघिल्लो शैक्षिक वर्षमा प्रवेश परीक्षामा ४० अंक ल्याउनेलाई एलएलबीमा भर्ना गर्ने तयारीसहित प्रवेश परीक्षाको प्रक्रिया सुरु गरेको थियो । गत चैतबाट भर्ना प्रक्रिया पनि सुरु भएको थियो । गत २६ चैतसम्म प्रवेश परीक्षा फाराम भर्ने समय दिएर क्याम्पसले गत ४ जेठमा परीक्षा लिने तयारी गरेको थियो । तर, खुला भर्ना गर्नुपर्ने माग गर्दै गत २६ वैशाखमै क्याम्पसमा तालाबन्दी भयो । तालाबन्दीका कारण प्रवेश परीक्षा नै रोकियो ।

भर्नासम्बन्धी विवाद सर्वोच्च अदालतसम्म पुग्यो । खुला भर्ना नगर्न माग गर्दै सर्वोच्च अदालतमा रिटसमेत परेको थियो । ३ असारमा त्रिविबाट क्याम्पसको क्षमता यकिन गरी संख्या तोकेर पूर्णकालीन विद्यार्थी, समावेशी ढंगले भर्ना गर्न अदालतले अन्तरिम आदेश जारी गर्‍यो । कानुन संकायले नेपाल ल क्याम्पसमा दुई सय ४० देखि तीन सय भर्ना गर्न सक्ने भन्दै त्रिवि कार्यकारीमा पठायो । त्रिवि कार्यकारीले सोहीअनुसार तीन सय सिट निर्धारण गरी पठायो ।

त्रिवि कार्यकारीले सिट निर्धारण गरेपछि ५ मंसिरमा पहिले फाराम भरेकासहित तीन सय भर्ना गर्नेगरी ८ मंसिरदेखि मसान्तसम्म फाराम खुलायो । तर, विद्यार्थीले मानेनन् । फेरि, १५ मंसिरमा क्याम्पसमा तालाबन्दी गरे । त्यो तालाबन्दी फागुन पहिलो साता मात्रै खुलेको छ ।

नयाँ भर्नासमेत अन्योलमा
भर्नासम्बन्धी विवाद चुलिएपछि उपकुलपतिले प्राध्यापक पूर्णमान शाक्यको संयोजकत्वमा माघ पहिलो साता नौ सदस्यीय उच्चस्तरीय समिति गठन गरेका थिए । सो समितिले अहिलेसम्म रिपोर्ट बुझाएको छैन । नेपाल ल क्याम्पसका प्रमुख डा. डिएन पराजुलीले नयाँ भर्ना प्रक्रियाका लागि समेत केन्द्रबाट जानकारी नआएको बताए । ‘सामान्यतया चैतमा भर्ना खुलाउनुपर्छ, झन् समस्या छ,’ उनले भने, ‘एलएलबी कार्यक्रम के गर्ने भन्ने अनिश्चित छ ।’ त्रिविले गठन गरेको उच्चस्तरीय समितिका संयोजक पूर्णमान शाक्यले भने एक–दुई सातामै रिपोर्ट तयार हुने बताए । उनले भने, ‘केही काम बाँकी छ, रिपोर्ट बन्दै छ, एक–दुई सातामा रिपोर्ट आएर कार्यान्वयन हुन्छ ।’ समितिले नेपाल ल क्याम्पससहित अन्य क्याम्पसमा समेत कानुनी शिक्षालाई कसरी व्यवस्थापन गर्ने भन्ने सुझाब दिनेछ ।

 


नयाँ पत्रिका




थप समाचार


‘अध्यादेशमार्फत विधेयक टुंगो लगाउँछौँ’

‘अध्यादेशमार्फत विधेयक टुंगो लगाउँछौँ’

चिकित्सा शिक्षासम्बन्धी विधेयक पारित नहुँदै व्यवस्थापिका संसद्को कार्यकाल सकिएपछि उक्त विधेयकलाई अब अध्यादेशमार्फत टुंगो लगाइने एकजना मन्त्रीले बताएका छन्। संसद अस्तित्वमा नरहेपनि विधेयक पारित गराउन ...

२९ पछि लोकतान्त्रिक गठबन्धन घोषणा

२९ पछि लोकतान्त्रिक गठबन्धन घोषणा

निर्वाचन आयोगले तोकेको बन्दसूचीका उम्मेदवारको नाम पेस गर्ने समयसीमा पछि लोकतान्त्रिक गठबन्धनको घोषणा गरिने भएको छ । आयोगले २९ असोजसम्मका लागि समानुपातिकका उम्मेदवारको नाम पठाउने ...

त्रिशूलीमा खस्दा ट्रकसहित चालक बेपत्ता

त्रिशूलीमा खस्दा ट्रकसहित चालक बेपत्ता

मलेखु (धादिङ), साउन १२ । पृथ्वी राजमार्गअन्तर्गत गजुरी गाउँपालिका–२ बिहानी पम्प नजिकैबाट आज बिहान एउटा ट्रक त्रिशूली नदीमा खसेर बेपत्ता भएको छ । जिल्ला ट्राफिक ...





ट्रेन्डिङ