बुटवल - रुपन्देहीको मर्चवारमा एक किशोरीको सामूहिक बलात्कार भएको छ । आइतबार राति ११ बजे सम्मरीमाई गाउँपालिकामा १६ वर्षीया किशोरीको सामूहिक बलात्कार भएको इलाका प्रहरी कार्यालय मर्चवारका प्रहरी निरीक्षक चित्रबहादुर घलेले जानकारी दिए ।

सम्मरीमाई गाउँपालिका–३ स्थित गाउँमा महायज्ञ चलिरहेको बेला आफ्नै घरमा रहेकी किशोरीलाई घर बाहिर बोलाएर नजिकै निर्माणाधीन भवनमा लगी बलात्कार गरेको प्रहरीले जनाएको छ । सोमबार इलाका प्रहरी कार्यालय मर्चवारमा पुगेर पीडितका आफन्तले जाहेरी दिएका छन् ।

जाहेरी परेलगत्तै प्रहरीले बलात्कारमा संग्लन तीन युवालाई नियन्त्रणमा लिएको इलाका प्रहरी कार्यालय मर्चवारले जनाएको छ । प्रहरीका अनुसार पक्राउ परेका युवाहरू तीनै जना २२ देखि २३ वर्ष उमेर समूहका छन् । घटनाको बारेमा अनुसन्धान गरेपछि थप जानकारी दिइने प्रहरीले जनाएको छ ।

किशोरीको भैरहवास्थित भीम अस्पतालमा उपचार भएको छ । किशोरीका बुबा र आमा दुवै जना उपचारका क्रममा भारतको मुम्बईमा छन् । उनको बुबा बिरामी छन् । उनी शारीरिक रूपमा अस्वस्थ हजुरबुबा, एक बहिनी र भाइसँगै बस्दै आएकी छन् ।