एजेन्सी - इरानी राष्ट्रपति हसन रुहानीले अमेरिकी दबाबसामु आफ्नो मुलुक नझुक्ने बताएका छन्। तेहरानमा आयोजित पत्रकार सम्मेलनमा उनले बाध्य भएर अमेरिकासँग वार्ता नगर्ने पनि बताए।

अमेरिकाको कडा आर्थिक प्रतिबन्धका कारण इरानी अर्थव्यवस्था कमजोर स्थितिमा पुगेका बेला रुहानीले यस्तो अडान सार्वजनिक गरेका हुन्।

‘इरानविरुद्ध अमेरिकाको अधिकतम दबाब नीति असफल भइसकेको छ, हाम्रो शत्रु राम्ररी जान्दछ कि उसको रणनीति अप्रभावी भइसकेको छ, इरानको सहयोगविना मध्यपूर्वमा शान्ति र स्थिरता सम्भव छैन,’ उनले भने।

अमेरिकी प्रतिबन्धका कारण इरानले तेल बेच्न पाइरहेको छैन। इरानले अमेरिकासँग नयाँ परमाणु सन्धि गर्न चाहिरहेको छैन। इरानको भनाइ छ– जबसम्म अमेरिका २०१५ को परमाणु सम्झौता पुनर्बहाली गर्दैन र आर्थिक प्रतिबन्ध हटाउँदैन, तबसम्म वार्ता हुन सक्दैन।

गत ३ जनवरीमा अमेरिकाले इरानी प्रभावशाली सैन्य कमान्डर कासीम सुलेमानीलाई मारिदिएपछि दुई देशबीचको शत्रुता चरमस्थितिमा पुगेको छ।