काठमाडौं - आइसिसी विश्वकप क्रिकेट लिग–टु अन्तर्गत त्रिदेशीय सिरिजमा ओमानसँग नेपाल ८ विकेटले पराजित भएको छ। २५० रनको लक्ष्य पछ्याउँदै ब्याटिङ गरेको ओमानले ४७.२ ओभरमा मात्र २ विकेटको क्षतिमा लक्ष्य भेटाएको हो। ओमानको जितमा कप्तान जिसान मकसोद र अकिब लियासले १६७ रनको साँझेदारी गर्दै जित दिलाए।

अकिबले सर्वाधिक १०९ रन बनाए। उनले शतक बनाउने क्रममा १०८ बलमा १२ चौका र १ छक्का प्रहार गरे।

उनकै उत्कृष्ट प्रदर्शन ओमानले यो सिरिजमा दोस्रो पटक जित हात पारेको हो। उनले ३७ रन बनाउँदा करण केसीको बलमा आरिफ शेखले क्याच छुटाए। त्यहि क्याच नेपालको हारको मुख्य कारण बन्यो। आरिफको हातबाट जीवन दान पाएका अकिबले शतक बनाए। त्यस्तै, कप्तान जिसान ६८ रनमा अविजित रहे।

४९ रन हुँदा पहिलो विकेटको रुपमा जतिन्दर सिंहलाई व्यक्तिगत २३ रनमा गुमाएको ओमानको ८३ रन मा खवार अली ४१ रनमा आउट भए। तर त्यसपछि तेस्रो र चौथो नम्बरमा ब्याटिङ गर्न आएका अकिब र जिसानले उत्कृष्ट प्रदर्शन गरे। ओमानका ब्याट्सम्यानविरुद्ध नेपालका कुनै पनि बलर चल्न सकेनन्।

नेपालका लागि कुशल मल्ल र सुशन भारीले समान १–१ विकेट लिए।

यसअघि त्रिवि क्रिकेट मैदानमा टस हारेर पहिले ब्याटिङ गरेको नेपालले निर्धारित ५० ओभरमा ८ विकेटको क्षतिमा २४९ रन बनाएको थियो । नेपालका लागि कप्तान ज्ञानेन्द्र मल्लले अर्धशतक बनाए। कप्तान ज्ञानेन्द्रले ७६ बलमा ६ चौका र १ छक्का प्रहार गर्दै ५६ रन बनाए।

ओपनिङमा आएका कप्तान ज्ञानेन्द्रले पहिलो विकेटका लागि सुवास खकुरेलसँग ४८ रनको साँझेदारी गर्दै राम्रो सुरुवात दिलाएका थिए। तर सुवास २२ रनमा आउट भए।

त्यसपछि ब्याटिङ गर्न आएका पारस खड्कासँग मिलेर कप्तान ज्ञानेन्द्र ५९ रनको साँझेदारी गर्दै नेपालको स्कोर १०७ सम्म पुर्याए। तर पारस २३.१ ओभरमा मोहम्मद नदिमको बलमा ३८ रन बनाएर आउट भए।त्यस्तै, नेपालका लागि विनोद भण्डारीले ३५ रन बनाए। आरिफ शेख र कुशल मल्लले समान २८–२८ रन बनाए। कुशलले २४ बलमा २ छक्का र २ चौका प्र्रहार गर्दै २८ रन बनाएका थिए। करण केसीले १० रन जोडे।सन्दीप लामिछाने १० र कमलसिंह ऐरी ९ रनमा अविजित रहे।

ओमानका लागि अकिब लियासले ४ विकेट लिए। उनले १० ओभर बलिङ गर्दै ३६ रन खर्चिए। त्यस्तै, मोहम्मद नदिमले ३ विकेट लिए।