तेहरान - इरानमा कुसाम सोलेमानीको अन्त्येष्टिका क्रममा भागदौड हुँदा कम्तिमा ३५ जनाको मृत्यु भएको छ । कर्मन सहरमा भएको अन्त्येष्टिका क्रममा लाखौं मानिस सहभागी थिए । अनियन्त्रित भीडका बीच भागदौड हुँदा यस्तो घटना भएको हो । जहाँ ४८ जना घाइते भएका छन् । स्थानीय मिडियाका अनुसार लाखौं मानिस सोलेमानीको अन्त्येष्टिमा सहभागी छन् ।

इरानी कुद्स फोर्सका कमाण्डर सोलेमानी गत शुक्रबार अमेरिकी आक्रमणबाट इराकमा मारिएका थिए । मंगलबार उनको अन्त्येष्टिको क्रममा सहभागी मानिस चिच्याउँदै र भाग्दै गरेको भिडियो सामाजिक सञ्जालमा समेत भाइरल बनेको छ ।

भिडियोमा देखिए अनुसार कर्मन सहरको अधिकांश भाग सोलेमानीका मलामीहरुले ढाकिएको छ । सोलेमानीको शवका अघि उभिएर इरानी नेता अयोतल्याह खमेनीले आँशु चुहाएका थिए ।
यस्तै सोलेमानीकी छोरीले शोकसभालाई सम्बोधन गर्दै अमेरिकालाई चेतावनी दिएकी थिइन् ।