काठमाडौं - स्टार क्रिकेटर सन्दीप लामिछानेले ‘द हन्ड्रेड’ र टी–१० लिग क्रिकेट प्रतियोगिता खेल्ने भएका छन् । इंग्ल्यान्ड र वेल्समा आयोजना हुने ‘द हन्ड्रेड’ क्रिकेट प्रतियोगिताको ड्राफ्टबाट सन्दीपलाई बुधबार राति बिर्मिङहाम फोनिक्सले अनुबन्धित गरेको हो । सन्दीपलाई फोनिक्सले एक लाख पाउण्डमा आफ्नो टिमा अनुबन्धित गरेको हो । योसँगै सन्दीपले करिब एक करोड ४६ लाख नेपाली रुपैयाँ पाउने छन् ।

१०० बलको ‘द हन्ड्रेड’ प्रतियोगिता क्रिकेट दुनियाँकै पहिलो नयाँ अवधारणामा खेलाउन लागिएको प्रतियोगिता हो । डबल राउण्ड रोविनको आधारमा हुने यो प्रतियोगितामा आठ टिमको सहभागिता रहनेछ ।

त्यस्तै, बुधबार राति नै सन्दीप अर्को प्रतियोगिताको लागि पनि अनुबन्धित भएका छन् । सन्दीप यूएईमा हुने टी–१० लिग क्रिकेटमा सन्दीपले दोस्रोपटक खेल्ने भएका हुन् । सन्दीपलाई कर्नाटकाले ४५ हजार अमेरिकी डलरमा आफ्नो टिममा भित्र्याएका छन् ।

योसँगै सन्दीप लामिछाने एकै दिन दुई वटा प्रतियोगितामा गरी करिब दुई करोड नेपाली रुपैयाँमा अनुबन्धित भएका हुन् ।