काठमाडौँ - चिनियाँ राष्ट्रपति सी जिनपिङको नेपाल भ्रमणका लागि रातारात चिटिक्क पारिएको तीनकुने पार्क फेरि उजाड बन्न थालेको छ । माटोको डिल उठाएर रोपिएका बिरुवा सुक्न थालेका छन् । बिरुवा सुक्न थालेपछि सर्वसाधारणले भन्न थालेका छन्, ‘भिभिआइपी आउँदा टालटुल गर्ने र अरूवेला अलपत्र छोड्ने प्रवृत्ति पुनः दोहोरिने भयो ।’

हतारमा बनाउने र फुर्सदमा बिगार्ने प्रवृत्ति देखेर नागरिक हैरान छन् । ‘ठूला मान्छे आउँदा लाज छोप्न बनाइएको पार्क पुनः फोहोरघारीमा परिणत हुने त होला,’ तीनकुनेमा भेटिएका दीपेश कार्कीले भने ।

राष्ट्रपति सीको नेपाल भ्रमणका लागि राजधानी काठमाडौंलाई सुन्दर बनाउने क्रममा सबैभन्दा बढी चर्चा यही पार्कको थियो । काठमाडौं महानगरपालिका र सहरी योजना आयोगका पदाधिकारी एवं कर्मचारी दसैँको रमाइलो छोडेर यही पार्क बनाउन खटिएका थिए । उपत्यकाका तीनवटा नर्सरीबाट आवश्यक रुख, बिरुवा र घाँस ल्याएर रोपिएको थियो ।

अब के हुन्छ ?
काठमाडौं महानगरपालिकाले तीनकुनेपार्क अब फोहोरको थुप्रो र झारैझारले नभरिने दाबी गरेको छ । सहरी योजना आयोगले पार्कको डिजाइनसमेत तयार भइसकेको जनाएको छ । ‘पार्क बनाउने काम चिनियाँ राष्ट्रपतिको नेपाल भ्रमणको पूर्वसन्ध्यामा रातरात गरियो । तर,यसको डिजाइनबारे आयोगमा गत ६ महिना अघिदेखि नै छलफल भइरहेको थियो,’ आयोगका उपाध्यक्ष सरोज बस्नेतले भने ।

उनका अनुसार हवाईमार्ग भई राजधानी छिर्नेबित्तिकै सबैले देख्ने पहिलो खुला ठाउँ भएकाले सुन्दर बनाउन डिजाइन तयार पारिएको हो । ‘चिनियाँ राष्ट्रपतिको भ्रमणमा
त्यसलाई कार्यान्वयन गर्ने मौका मिल्यो,’ उनले भने ।

मुआब्जा विवाद कायमै
सरकारले तीनकुनेमा हरियालीयुक्त पार्क बनाउने योजना ०५९ मै ल्याएको थियो । तर, पटक–पटक चर्किएको मुआब्जा विवादका कारण अहिलेसम्म पार्क निर्माण हुन सकेको छैन । सो स्थानमा पर्ने २३ रोपनी जग्गा व्यक्तिगत नाममा दर्ता भएको र जग्गाधनीलाई प्रदान गरिने मुआब्जा विवादका कारण पार्क निर्माण कार्य रोकिएको छ । ४८ रोपनीमध्ये करिब २५ रोपनी जग्गा मात्रै सरकारी हो । बाँकी जग्गाका लागि मुआब्जा दिनुपर्ने महानगरपालिकाले जनाएको छ ।

तिहारलगत्तै जग्गाधनीसँग छलफल गरेर मुअब्जा वितरण गर्ने तयारी महानगरको छ । मुअब्जा विवाद टुंगो लाग्नेबित्तिकै पार्क बनाउन सुरु गरिने महानगरपालिकाले जनाएको छ । ‘हेर्दा सुन्दर र बस्दा आनन्द लाग्ने खुला पार्क नै यो ठाउँका लागि उपयुक्त हुन्छ,’ डिजाइन तयार गर्ने टोलीका सदस्य निलीमा थापा श्रेष्ठले बताइन् ।

नयाँ पत्रिका