काठमाडौं - भैरहवामा निर्माण भइरहेको गौतम बुद्ध अन्तर्राष्ट्रिय विमानस्थलको निर्माणको काम अन्तिम चरणमा पुगेको छ। विमानस्थल सञ्चालनका लागि आवश्यक संरचना निर्माणको काम अन्तिम चरणमा पुगेसँगै फिनिसिङको काम सुरु भएको छ।

विमानस्थल सुदृढीकरण कार्य आयोजना इकाई रुपन्देहीका प्रमुख प्रवेश अधिकारीका अनुसार विमानस्थल सञ्चालनका लागि आवश्यक संरचना निर्माणअन्तर्गतका भौतिक संरचना निर्माणको काम सकिएको छ। टर्मिनल भवनमा फिनिसिङ र उपकरण जडानको काम सुरु भएको उनको भनाइ छ।

सरकारले २०१४ नोभेम्बरमा चिनियाँ ठेकेदार ‘नर्थ वेस्ट सिभिल एभिएसन’सँग गौतम बुद्ध अन्तर्राष्ट्रिय विमानस्थल निर्माणका लागि सम्झौता गरेको थियो। सरकारले ६ अर्ब २२ करोड रुपैयाँमा ‘आइसिबी-जिरो एक’ अन्तर्गत विमानस्थलको ३ हजार मिटरको रनवे, ट्याक्सी वे, एप्रोन, टर्मिनल भवन र टावर कन्ट्रोल भवन निर्माणका लागि सम्झौता गरेको थियो।

विमानस्थलमा रनवे वे निर्माणको काम सकिसकेको छ भने प्रशासनिक भवन निर्माणको काम पनि लगभग सकिसकेको छ । टर्मिनल भवनको मुख्य संरचनाको काम पनि सकिएको छ। उनको अनुसार अहिले टर्मिन भवनमा मार्बल, टायल, सिसिटिभी, एक्स–रे मेसिन जडान लगायनको काम सुरु भएको छ।

योसँगै निर्माण कम्पनीले अहिले कार पार्किङ क्षेत्र बनाउने काम जारी छ। टर्मिनल भवनमा रहने ८/१० वटा मुख्य उपकरणमध्ये ब्यागेज ह्यान्डिलिङ र लिफ्टको कामबाहेक अन्य उपकरण जडानको काम सुरु भैसकेको छ ।

ब्यागेज बेल्ट र लिफ्टको सामान भने नआइपुग्दा काम सुरु हुन सकेको छैन । अबको एक महिनाभित्र बाँकी सामान आइपुगेको अवस्थामा डिसेम्बर भित्रमा जडान सम्पन्न हुने अधिकारी बताउँछन् ।

सम्रगमा विमानस्थलको भौतिक प्रगति ८२ प्रतिशतभन्दा बढी भएको छ।

बाँकी १७/१८ प्रतिशत काम भनेको उपकरण जडानको मात्र हो। यसमा ६ प्रतिशतको हाराहारीमा काम भइसकेको र सिभिल तर्फको ७ प्रतिशत काम बाँकी छ भने उपकरण जडान तर्फ करिब १२ प्रतिशत काम बाँकी रहेको छ।