कृषि विकास बैंकको पौने पाँच करोड चोरी, थप पाँच अर्ब चोरिनबाट बैंक यसरी जोगियो !

2019-09-26

काठमाडौँ - एटिएम प्रणाली ह्याक गरेर चिनियाँ ह्याकरले २ करोड चोरेको महिना दिन नपुग्दै अफ्रिकन ह्याकरको योजनामा सरकारी स्वामित्वको कृषि विकास बैंकबाट झन्डै ५ करोड चोरी भएको छ । अफ्रिकन ह्याकर ‘काले’ भनिने पिटरले भारतको मुम्बईमा बसेर कृषि विकास बैंक सिरहाको लहानस्थित शाखाको ४ करोड ७३ लाख ९६ हजार नेपाली एजेन्टको नाममा पठाएका हुन् ।

सिरहा शाखाको पौने ५ करोड व्यक्तिको नाममा ट्रान्सफर ह्याकरको पहिलो ‘ट्रायल’ थियो । बैंकका सीमित कर्मचारीलाई मात्रै थाहा हुने बैंकको ‘मेकर’ र ‘चेन्जर’ पासवर्ड प्रयोग गरेर ट्रेजरीको रकम निकालिएको थियो । पहिलो योजना सफल भएसँगै पिटरको समूहले ५ अर्ब लुट्ने तयारी गरेको थियो । यही समूह संलग्न अर्को घटनामा पक्राउ परेपछि प्रहरीले सुइँको पाएर योजना असफल पारेको हो ।

रेमिट लुटेरा पक्राउ परेपछि खुल्यो रहस्य
अपराध महाशाखाले बानेश्वरको पानस रेमिट लुट्नेहरूलाई पक्राउ गरेपछि कृषि विकास बैंकको रकम चोरी भएको पत्ता लागेको थियो । महाशाखाका अनुसार गत आइतवार दिउँसो ३ः०० बजे नयाँ बानेश्वरस्थित पानस रेमिटबाट शंकास्पद रुपमा रकम झिकिएको भन्दै सुचना आयो । प्रहरी घटना स्थल पुग्यो । रेमिटकै कर्मचारी सुमिना धितालको पिन कोड प्रयोग गरी अपरिचित चार जनाले ६०–६० हजारका दरले दुई लाख ४० हजार झिकेको अनुसन्धानमा खुल्यो । तर, उक्त पिन कोडमा रकम पठाउने भने कुनै पनि व्यक्ति थिएन । घटना शंकास्पद देखिएपछि प्रहरी थप अनुसन्धानमा लाग्यो । लुटेराले रेमिटको ‘मेकर’ र ‘चेन्जर’ दुवै पासवार्ड प्रयोग गरी रेमिटकै ट्रेजरीको रकम सुमिना धितालको पिन कोडमा पठाएको खुल्यो ।

सोही रकम अपरिचित चार जनाले झिकेको खुल्यो । उनीहरूलाई पछ्याउँदै जाँदा तार्केश्वर–२ काभ्रेस्थलीका २६ बर्षीय सञ्जय घले पक्राउ परे । सोधपुछपछि रकम झिक्नेमा लक्ष्मी लामा, निर्मला तामाङ, निमा तामाङ पनि रहेको खुल्यो । प्रहरीले उनीहरूलाई पनि पक्राउ गर्यो र रेमिटबाट झिकेको २ लाख ४० हजार उनीहरूको साथबाट बरामद गर्यो । रेमिटबाट रकम झिक्न लगाउने नुवाकोट मेघाङ–४ का ४३ बर्षीय लवाङ तामाङ रहेको खुलेपछि प्रहरीले उनलाई पनि पक्राउ गर्यो । सोधपुछपछि तामाङसँग थप ३१ लाख रहेको रहस्य खोले । प्रहरीले ३१ लाख रुपैयाँको स्रोत खोतल्न थालपछि मात्रै कृषि विकास बैंक लुटिएको रहस्य पत्ता लाग्यो । लवाङ अफ्रिकन ह्याकर पिटरका नेपाली एजेन्ट भएको खुलेसँगै कृषि विकास बैंकको ५ अर्ब चोरी हुन लागेको पनि पर्दाफास भयो ।

महानगरीय अपराध महाशाखाका प्रमुख एसएसपी सहकुल थापाले पक्राउ परेका रेमिट लुटेरामाथि मिहिन अनुसन्धान भएको भए कृषि विकास बैंकको पाँच अर्ब थाहै नपाई ह्याकरको हातमा पुग्ने बताए । ‘हामीले बैंक लुटमा संलग्नहरूलाई अरु नै केसमा पक्राउ गरेका थियौं । फरक खालको क्ल्यू फेला परेपछि थप सोधपुछ गर्यौं । त्यसपछि उनीहरूले कृषि विकास बैंकको रकम झिकेको खुल्यो । घटनामा संलग्न थप पक्राउ गर्यौं । त्यसपछि मात्रै बैंकबाट पाँच अर्व रुपैयाँ लुटेर लैजाने उनीहरूको योजना खुल्यो । यस बेलासम्म बैंकलाई ट्रेजरीको ४ करोड ७३ लाख ९६ हजार रुपैयाँ झिकिएको सुइको समेत थिएन ।’ घटनामा संलग्न १२ अभियुक्तलाई प्रहरीले पक्राउ गरेको छ ।

अफ्रिकन ‘काले’को नेपाल कनेक्सन र बैंक लुट्ने योजना
अफ्रिकन पिटर डेढ वर्षअघि काठमाडौं आएका थिए । नेपाली र हिन्दीसमेत बोल्नसक्ने पिटर प्रविधिमा अब्बल थिए । त्यहीबेला उनले कृषि विकास बैंकको ‘मेकर’ र ‘चेन्जर’ पासवर्ड हात पारे । यही हतियार प्रयोग गरेर उनी बैंक लुट्न चाहन्थे । तर, उनलाई आवश्यक थियो, विश्वासिलो नेपाली सहयोगी ।

यही क्रममा काठमाडौंमा रहँदा उनको भेट नुवाकोटका ४३ वर्षीय लवाङ तामाङसँग भयो । पिटर कालो बर्णका भएकाले लवाङले नै उनको नाम ‘काले’ राखिदिएका थिए । लवाङमार्फत् नै नेपाली एजेन्टहरूको खोजी भयो । यो धन्दामा बैंककै खातावालालाई पहिलो प्राथमिकतामा राखे । खाता नभएकाहरूलाई खोल्न लगाए । आवश्यक टिम तयार भएपछि सबै मुम्बई पुगे । बैंक लुट्ने योजना मुम्बईमै बन्यो ।

लुटेको १० प्रतिशत दिनेगरी नेपाली एजेण्ट तयार
बैंकको ट्रेजरीको रकम बैंककै खातावाला एजेन्टको खातामा ट्रान्सफर गर्ने र त्यसको १० प्रतिशत एजेन्टले नै राखेर बाँकी हुण्डीमार्फत् पिटरलाई पठाउने सहमति थियो । त्यसैअनुसार पिटर मुम्बईमै बसे भने अन्य नेपाल फर्किए । कृषि विकास बैंकको लहान शाखा ‘ट्रायल’को रुपमा रोजे । ट्रायल सफल भयो । बैंकको ट्रेजरीमा रहेको ४ करोड ७३ लाख ९६ हजार एजेन्टको खातामा ट्रान्सफर गरे । सौराहाको युजर नेमबाट लहानको कम्प्युटर प्रयोग गरी बैंकको नुवाकोटस्थित शाखा कार्यालयबाट रकम झिकेका थिए । सो रकममध्ये १० लाख न्यूरोडस्थित भारतीय नागरिक शुबन्कर पन्जाको सुन पसलबाट हुण्डी गरी पिटरलाई पठाइयो । यतिबेलासम्म पनि बैंकका कर्मचारीलाइ सुईंको थिएन । लहान शाखाको रकम मुलुकका विभिन्न ६ वटा शाखाका ११ जनाको खातामा रकमान्तर भएको प्रहरीको भनाई छ । प्रहरीका अनुसार कैलाली भजनी, पर्वतको कुश्मा, चितवनको सौराहा, रसुवाको त्रिशुली, काठमाडौंको न्युरोडसहित ६ शाखामा रकमान्तर भएको हो । बैंकले सबै ११ जनाको खाता लक गरिसकेको जनाएको छ ।

प्रहरीले घटनामा संलग्न लवाङ, पुष्पराज खड्का, विद्यासागर लामिछाने, श्रवणकुमार श्रेष्ठ, सुनिता श्रेष्ठ, शुबन्कर पन्जा, बिजय साह, चन्द्रबहादुर बुढालगायत १२ जनालाई पक्राउ गरिसकेको छ । तर, घटनाको मुख्य योजनाकार पिटर भने फरार छन् ।

शंकाको सुई बैंककै कर्मचारीतर्फ
कृषि विकास बैंकमा रकम लुटिएको तथा हिनामिना भएको यो नै पहिलो घटना होइन । यसअघि ०७४ मा बैंकको स्वयम्भूस्थित शाखा कार्यालयबाट ३४ करोड रुपैयाँ कर्मचारीकै मिलेमतोमा अपचलन गरिएको थियो । त्यसको बर्ष दिनपछि सोही बैंकको न्यूरोडस्थित शाखा कार्यालयबाट कर्मचारीकै मिलेमतोमा चार करोड ९१ लाख हिनामिना गरिएको थियो । अनुसन्धानपछि दुवै घटनामा संलग्न अभियुक्तलाई प्रहरीले पक्राउ गरिसकेको छ । अहिलेको घटनामा पनि बैंककै कर्मचारी संलग्न हुनसक्ने आशंकासहित प्रहरीले घटनाको फरक ढंगले अनुसन्धान सुरु गरेको छ । प्रहरीका अनुसार बैंकको ट्रेजरीमा रहेको रकम व्यक्तिगत खातामा ट्रान्सफर गर्र्न ‘मेकर’ र ‘चेन्जर’ कोड प्रयोग नगरी सम्भव छैन । उक्त कोड बैंकका कर्मचारी बाहेक अन्यलाई थाहा हुँदैन ।

‘घटनामा बैंकको कर्मचारी पनि संलग्न हुन सक्ने आशंका छ । यसतर्फ ध्यान पुगेको छ । अनुसन्धान हुँदैछ । बैंकले पनि आन्तरिक रुपमा अनुसन्धान थालेको छ । केही न केही तथ्य अवश्य बाहिर आउला,’ अपराध अनुसन्धान महाशाखाका प्रमुख एसएसपी सहकुल थापाले भने ।

नेपाल प्रहरीका पूर्वडिआईजी हेमन्त मल्ल भन्छन्
बैकका लागि कर्मचारी नै चुनौती
बैंक लुटिने, ठगिनेजस्ता घटनामा बैंककै कर्मचारी संलग्न हुने गरेको विगतका घटना छन् । लहान घटनाले पनि त्यस्तै संकेत गरेको छ । नेपालका बैंक आफ्नै कर्मचारीबाट असुरक्षित छन् । त्यसैले नेपाल राष्ट्र बैकले आफ्नो नियमित अडिटमा पुनर्मुल्यांकन गर्न आवश्यक छ । नत्र यस्ता घटना दोहोरिरहन्छन् ।




थप समाचार


‘अध्यादेशमार्फत विधेयक टुंगो लगाउँछौँ’

‘अध्यादेशमार्फत विधेयक टुंगो लगाउँछौँ’

चिकित्सा शिक्षासम्बन्धी विधेयक पारित नहुँदै व्यवस्थापिका संसद्को कार्यकाल सकिएपछि उक्त विधेयकलाई अब अध्यादेशमार्फत टुंगो लगाइने एकजना मन्त्रीले बताएका छन्। संसद अस्तित्वमा नरहेपनि विधेयक पारित गराउन ...

२९ पछि लोकतान्त्रिक गठबन्धन घोषणा

२९ पछि लोकतान्त्रिक गठबन्धन घोषणा

निर्वाचन आयोगले तोकेको बन्दसूचीका उम्मेदवारको नाम पेस गर्ने समयसीमा पछि लोकतान्त्रिक गठबन्धनको घोषणा गरिने भएको छ । आयोगले २९ असोजसम्मका लागि समानुपातिकका उम्मेदवारको नाम पठाउने ...

त्रिशूलीमा खस्दा ट्रकसहित चालक बेपत्ता

त्रिशूलीमा खस्दा ट्रकसहित चालक बेपत्ता

मलेखु (धादिङ), साउन १२ । पृथ्वी राजमार्गअन्तर्गत गजुरी गाउँपालिका–२ बिहानी पम्प नजिकैबाट आज बिहान एउटा ट्रक त्रिशूली नदीमा खसेर बेपत्ता भएको छ । जिल्ला ट्राफिक ...





ट्रेन्डिङ