अस्ट्रेलियाको राजधानी क्षेत्रमा अब कानुनी रुपमै गाँजा खान पाइने

2019-09-26

काठमाडौं - अस्ट्रेलियाको राजधानी क्षेत्रमा अब गाँजाको उपभोग खुला भएको छ। सन् २०१६ मा अस्ट्रेलियाले मेडिकल उपचारमा गाँजाको उपयोग खुला गरेको थियो।

अस्ट्रेलियाको संसदले राजधानी क्यानबेरा र राजधानी क्षेत्र (द अस्ट्रेलियन क्यापिटल टेरिटोरी–एसीटी) भित्र गाँजाको उपभोग गर्न पाउने विधेयक पारित गरेपछि अब राजधानी क्षेत्रभित्र गाँजाको व्यक्तिगत उपभोग गर्न पाउने बीबीसीले उल्लेख गरेको छ।

एसीटीका सांसदले बुधबार पारित गरेको विधेयक अनुसार अब राजधानी क्यानबेरा क्षेत्रभित्र कुनै पनि वयस्क व्यक्तिले ५० ग्रामसम्म गाँजा साथमा राख्न पाउने छन् भने घरमा चार वटासम्म गाँजाको बोट हुर्काउन पाउने छन्।

तर राजधानी क्यानबेरा क्षेत्रबाहिर भने गाँजाको मेडिकलबाहेक व्यक्तिगत उपभोग गर्नमा लगाइएको प्रतिबन्ध कायमै छ। तर पनि आज पारित विधेयक संघीय संसदबाट उल्टाउन भने सकिन्छ।

विश्वका क्यानडा, स्पेन, उरुग्वे लगायतका देश र क्यालिफोर्नियासहित अमेरिकाको केही राज्यमा व्यक्तिगत रुपमा गाँजाको उपभोग गर्न कुनै प्रतिबन्ध छैन।

अस्ट्रेलियाको स्वास्थ्य विभागका अनुसार १४ वर्षभन्दा माथिका करिब ३५ प्रतिशत अस्ट्रेलियालीले आफ्नो जीवनकालमा कम्तीमा पनि एकपल्ट गाँजासेवन गर्ने गरेका छन्।

राजधानी क्यानबेरा क्षेत्रमा करिब ४ लाख बासिन्दा बस्छन्। यो क्षेत्रमा राजधानी क्यानबेरा सहर र यस वरपरका भूभाग पर्छन्।

आगामी जनवरी महिनाको ३१ तारिखबाट आज पारित कानुन लागू हुनेछ। तर बालबालिकाको छेउछाउ वा सार्वजनिक स्थलमा गाँजासेवन गर्न र बेचबिखन गर्न भने पाइने छैन।

गाँजा समर्थकहरूका अनुसार नयाँ कानुनले लागुऔषधका प्रयोगकर्ताको जोखिम घटाउने दाबी गर्छन् भने विरोधीहरु यसबाट गाँजासेवन गर्नेको संख्या ह्वात्तै बढ्ने बताउँछन्।

तर एसीटीले राज्यको मान्यता पाएको छैन। यसअघि पनि एसीटीले पारित गरेका कतिपय कानुन संघीय सरकारले उल्टाइदिएकाले यो कानुन पनि उल्टाइदिने सम्भावना रहेको छ। यसअघि सन् २०१३ मा एसीटीले समलिंगी विवाहलाई मान्यता दिएको कानुन सरकारले उल्टाइदिएको थियो।

गाँजासेवनमाथि प्रतिबन्ध हटाएका सांसदहरुले बुधबार यो कानुन संघीय सरकारले नउल्टाउने विश्वास व्यक्त गरेका छन्। तर उनीहरुले यसमा केही कानुनी जटिलता भने रहेको स्विकारेका छन्।

एसीटीको संसदमा महान्यायाधिवक्ता गोर्डन रामसेले आज पारित कानुनले कुनै पनि व्यक्तिले गाँजासेवन गर्दा संघीय कानुनअन्तर्गत पक्राउ पर्नबाट जोगाउन नसक्ने बताए।

छिमेकी राष्ट्र न्युजिल्यान्डले भने गाँजासेवन माथिको प्रतिबन्ध खुला गर्ने वा कायमै राख्ने भनेर अर्को वर्ष जनमत संग्रह गर्दैछ।




थप समाचार


पर्वत बनाइयो अहिलेसम्मकै ठुलो खुकुरी

पर्वत बनाइयो अहिलेसम्मकै ठुलो खुकुरी

काठमाडौं - पर्वतको जलजला गाउँपालिका–२ मल्लाज माझफाँटका दुर्गाबहादुर सुनारले ८० किलोको खुकुरी निर्माण गरेका छन्। तीन महिनाको अवधिमा उनको नेतृत्वमा चार जनाको टोलीले हालसम्मकै सबैभन्दा ...

उडिरहेको विमानले इन्धन खसाल्दा १७ विद्यार्थी घाइते

उडिरहेको विमानले इन्धन खसाल्दा १७ विद्यार्थी घाइते

एजेन्सी - एक यात्रुवहाक विमानले आपतकालीन अवतरणका लागि उडिरहेका बेला एक विद्यालयको मैदानमा इन्धन खसालेको छ। विमान स्थलबाट २६ किलोमिटर पूर्वमा रेहेको एलिमेन्टरी विद्यालयमा इन्धन ...

नासाले रोबोटका लागि अन्तरिक्षमा होटल खाेल्ने

नासाले रोबोटका लागि अन्तरिक्षमा होटल खाेल्ने

एजेन्सी - अमेरिकी अन्तरिक्ष एजेन्सी नासाले रोबोटहरूको लागि अन्तरिक्षमा होटल निर्माण गर्ने निर्णय गरेकाे छ। याे हाेटल रोबोटहरूका लागि मात्र हुनेछ। यो 'रोबोट होटेल'का नामले परिचित ...





ट्रेन्डिङ