काठमाडौँ - वैवाहिक अंगीकृत नागरिकताको विषयमा संसद्को राज्यव्यवस्था तथा सुशासन समितिले नयाँ प्रस्तावमा छलफल अघि बढाएको छ । नेपाली पुरुषसँग विवाह गरेर आउने विदेशी महिलालाई सात वर्षपछि र नेपाली महिलासँग विवाह गर्ने पुरुषलाई नेपालमा बसोवास गरेको १५ वर्षपछि अंगीकृत नागरिकता दिने विषयमा शनिबार सहमतिमा पुग्ने समितिको तयारी छ ।

समितिमा यसअघि पटक–पटक भएको छलफलको आधारमा प्रतिवेदन बनाइएको र त्यही प्रतिवेदनमाथि पनि सर्वसम्मत सहमतिको प्रयास गरिएको कांग्रेस सांसद डा. डिला संग्रौलाले बताइन् । उनका अनुसार शनिबार बस्ने समिति बैठकमा सर्वसम्मत नभए मतविभाजन गरेर भए पनि वैवाहिक अंगीकृत नागरिकताको विषय टुंगो लाग्ने सम्भावना छ ।

सांसद फरक ध्रुवमा सहमति गर्ने कसरत
वैवाहिक अंगीकृत नागरिकतासम्बन्धी विवाद मिलाउन उपसमिति बनाए पनि उपसमितिले सहमति निकाल्न सकेको छैन । त्यसैले यो विषय पुनः समितिबाट टुंगो लगाउने प्रयत्न भइरहेको छ । ‘नेपाली पुरुषसँग विवाह गरेर आउने विदेशी महिलालाई सात वर्षपछि र विदेशी ज्वाइँलाई नेपालमा १५ वर्ष बसोवास गरेपछि मात्र अंगीकृत नागरिकता दिने गरी प्रतिवेदन बनेको छ । यसबारे शनिबार टुंगोमा पुग्ने सम्भावना छ,’ कांग्रेस सांसद डा. डिला संग्रौला पन्तले भनिन् ।

सहमतिमा विधेयकमाथिका बाँकी विवाद मिल्ने र सहमति नभए मत विभाजनको सम्भावना पनि रहेको उनले बताइन् । पछिल्लो प्रतिवेदनमा पनि सांसदहरू एकमत छैनन् । ‘नेपाली महिलासँग विवाह गर्ने विदेशी ज्वाइँलाई नागरिकता दिने विषय संविधान, ऐन कानुन र अहिलेको विधेयकमा पनि कतै परिकल्पना गरिएको छैन । त्यसैले यो व्यवस्था हुनै सक्दैन,’ सत्तारुढ नेकपाका सांसद झपट रावलले भने ।