काठमाडौं – टी-२० विश्वकपको एसिया क्षेत्रीय छनोटमा शुक्रबार कुवेतले कतारलाई १० रनले साथै सिंगापुरले मलेसियालाई ८ विकेटले हराएको छन् । यो नतिजाले नेपाललाई फाइदा हुने देखिएको छ ।

अंक तालिकामा दुई खेल जितेको र एक बराबरी भएको सिंगापुर पाँच अंकसहित शीर्ष स्थानमा छ । तीन खेलमा एक जित, एक हार र एक बराबरी भएको कुवेत तीन अंकसहित दोस्रो स्थानमा छ । दुई खेल खेलेको नेपाल एक जित र एक हारसहित दुई अंक बनाउँदै तेस्रो स्थानमा छ ।

मलेसिया र कतारको पनि दुई अंक नै रहेपनि नेट रन रेटका आधारमा उनीहरु पछि छन् । मलेसिया र कतारले नेपालले भन्दा एक खेल बढी खेलेका छन् । यसैले अगाडि बढ्ने उनीहरुको सम्भावना सकिएको छ ।

प्रतियोगितामा कमजोर देखिएको कतारसँग पहिलो खेलमा नै नेपाल पराजित हुनुले अन्यौलमा पुगेको विश्वकप यात्रामा अब सम्भावना बढेको छ । नेपालभन्दा अघि रहेका दुवै टिम कुवेत र सिंगापुरसँग नेपालले खेल्नै बाँकी छ ।

अब शनिबार नेपालले कुवेतसँग र मलेसियाले कतारसँग खेल्नेछन् । अन्तिम खेल आइतबार सिंगापुर र नेपालबीच हुनेछ । यसअर्थमा आउने दुवै खेल नेपालले जितेमा आउँदो अक्टोवर ११ देखि युएईमा हुने टी-२० विश्वकपको ग्लोबल छनोटमा पुग्ने छ ।

नेपाल पहिलो खेलमा कतारसँग चार विकेटले पराजित भएको थियो । वर्षाले प्रभावित भएर नौ ओभरमा झारिएको दोस्रो खेलमा भने नेपालले मलेसियालाई ७ विकेटले हराएको थियो ।

कप्तान पारस फर्किए

कतारसँगको पहिलो खेलमा चोटका कारण फिल्डिङका बेला मैदानमा नआएका कप्तान पारस खड्काले मलेसियासँगको खेल गुमाएका थिए ।

ढाँडमा लागेको चोटका कारण मलेसियासँग नखेलेका पारस शनिबार कुवेतसँगको खेलमा खेल्ने भएका छन् । उनी शुक्रबारको प्रशिक्षणमा पनि उपस्थित छन् ।

कुवेतसँगको खेल नेपाली समय अनुसार शनिबार बिहान ७ः१५ मा सुरु हुनेछ ।