काठमाडौँ - पाँच वर्षपछि चिकित्सक परामर्श शुल्क वृद्धि हुने भएको छ । डाक्टरले बिरामी हेर्दा लिने शुल्कमा ८५ देखि एक सय ६० रुपैयाँसम्म वृद्धि गर्न लागिएको शुल्क पुनरावलोकन समितिका संयोजक डा. विकास देवकोटाले जानकारी दिए । यससँगै पाँचवर्षे अनुभव भएका विशेषज्ञ डाक्टरले लिँदै आएको चार सय ७५ रुपैयाँ शुल्क बढेर ६ सय ३५ पुग्ने भएको छ ।

स्वास्थ्य तथा जनसंख्या मन्त्रालयले अन्तर्राष्ट्रिय अभ्यासलाई आत्मसात् गर्दै शुल्क बढाउन लागिएको जनाएको छ । पाँच वर्षदेखि चिकित्सक परामर्श शुल्क बढेको थिएन । डाक्टरको योग्यता र अनुभवअनुसार फरकफरक दरमा शुल्क बढ्नेछ । ‘दुई–दुई वर्षमा शुल्क बढाउने प्रावधान छ,’ डा. देवकोटाले भने, ‘तर, लामो समयदेखि पुनरावलोकन हुन सकेको थिएन । यस वर्ष बढाउने तयारी छ, तर अन्तिम निर्णय भने भएको छैन ।’

वृद्धि भएपछिको शुल्क
एमबिबिएस पास, तर पाँच वर्ष सेवा अनुभव नभएका - अहिले : रु. ३३५, पहिले : रु. २५०
एमबिबिएसपछि पाँच वर्षको अनुभव भएका - अहिले : रु. ३९०, पहिले : रु. ३००
एमबिबिएसपछि फेलोसिप गरेका - अहिले : रु. ५३५, पहिले : रु. ४००
पाँच वर्षभन्दा कम अनुभव भएका विशेषज्ञ - अहिले : रु. ५९०, पहिले : रु. ४५०
पाँच वर्षभन्दा बढी अनुभव भएको विशेषज्ञ - अहिले : रु. ६३५, पहिले : रु. ४७५