रौतहट - छोरीको जीवन बिमा गराएर हत्या गर्ने एक जनालाई शुक्रबार प्रहरीले पक्राउ गरेको छ । घरमा आर्थिक संकट परेको भन्दै रौतहटको मौलापुर नगरपालिका–६ पथरा बुधरामका रामकिशोर राय यादवले ४ वर्षीय छोरी लक्ष्मीकुमारीको हत्या गरेको हो ।

प्रदेश २ को सरकारले छोरीका लागि ‘बेटी बचाउ, बेटी पढाउ’ अभियान सुरु गरी गरिरहँदा रौतहटमा भने आफ्नो आर्थिक संकट हटाउन छोरीको जीवन बिमा गरी हत्या गरेको रहस्य खुलेको हो । १७ असारमा घरमै सुतेकी बालिकाको शव भोलिपल्ट बिहान गाउँकै पोखरीमा भेटिएको थियो ।

घटनाको अनुसन्धान गर्ने क्रममा बालिकाको बुवाको गतिविधि शंकास्पद लागेपछि प्रहरीले उनलाई नियन्त्रणमा लिएको थियो । यादवले गरुडाको ‘प्रभु लाइफ इन्सुरेन्स कम्पनी’मा १९ जेठमा छोरीको २५ लाखको जीवन बीमा गराएको तथ्य फेला परेको प्रहरीले जानकारी दिएको छ । छोरीको जीवन बिमा गराएर हत्या योजना अनुरुप बिमा गराएको प्रहरी नायब उपरीक्षक नवीन कार्कीले बताए ।

आमासँगै सुतेकी छोरीलाई बोकेर पोखरी नजिक पुर्‍याएर हत्या गरेको यादवले स्वीकारेका छन् । बिमा गरेको एक महिनाभित्र बिमित व्यक्तिको मृत्यु भएमा दोब्बर रकम भुक्तानी पाउने कुरा सुनेपछि छोरीको हत्या गरेको उनको बयान छ ।

यादवलाई मुलुकी अपराध संहिता, २०७४ को ज्यानसम्बन्धी कसुरअन्तर्गत मुद्दा दर्ता गरी जिल्ला अदालत गौरबाट ५ दिनको म्याद थप गरिएको प्रहरीले जनाएको छ । तत्कालीन माओवादी जनयुद्धमा सक्रिय यादवले घरमा आर्थिक संकट पर्दै गरेपछि त्यसको पैसा पाउने आशमा छोरीको बिमा गरी हत्या गर्ने योजना बनाएको प्रहरीले गरेको पत्रकार सम्मेलनमा जानकारी दिएको हो ।

छोरीको हत्यापछि यादवले बिमा वापतको रकम निकाशाका लागि सक्रिय हुँदै आएका थिए । यसैका आधारमा प्रहरीले उनलाई पक्राउ गरेको जिल्ला प्रहरी कार्यालय रौतहटले जनाएको छ ।