काठमाडौँ - काठमाडौं महानगरपालिकाले आर्थिक वर्ष ०७६/७७ का लागि झन्डै साढे १५ अर्बको बजेट ल्याउने भएको छ । मंगलबार दिउँसो तीन बजे राष्ट्रिय सभागृहमा मेयर विद्यासुन्दर शाक्यले बजेट भाषण गर्नेछन् । स्रोतका अनुसार महानगरले करिब १५ अर्ब ४६ करोड ९९ लाख ४८ हजारबराबरको बजेट ल्याउने तयारी गरेको छ । यद्यपि, मंगलबार दिउँसो १ बजे बस्ने नगर कार्यपालिकाले बजेटको आकारलाई अन्तिम रूप दिनेछ ।

बैठकले नगरसभामा प्रस्तुत आर्थिक विधेयकसम्बन्धी प्रस्ताव तयार गर्नेछ । महानगरले चालू आर्थिक वर्षको भन्दा २ अर्ब बढीको बजेट ल्याउने तयारी गरेको हो । चालू आर्थिक वर्षमा महानगरले १३ अर्ब २ करोड १२ लाख ३७ हजार रुपैयाँको बजेट ल्याएको थियो ।

चालू वर्षमा आधा बजेट पनि खर्च भएन
कुल बजेटमध्ये चालू आर्थिक वर्षमा महानगरले ६ अर्ब मात्रै खर्च भएको जनाएको छ । रानीपोखरी, धरहराजस्ता ठूला परियोजना खोसिएपछि बजेट खर्च हुन नसकेको महानगरले जनाएको छ । महानगरले ५ जेठमा नीति तथा कार्यक्रम ल्याएको थियो । नीति तथा कार्यक्रममा सम्पदा संरक्षण, भौतिक पूर्वाधार, वातावरण सुधारलगायतका महत्वाकांक्षी योजना समेटिएका छन्  ।