काठमाडौँ - मोजाम्बिकमा समुद्री आँधीका कारण कम्तीमा हजार जनाको मृत्यु भएको जनाइएको छ । राष्ट्रपति फिलिप नुसीले 'इडाई' आँधीका कारण मृत्यु हुनेको संख्या हजारभन्दा बढी भएको बताएका हुन् । नुसीका अनुसार प्रतिघण्टा १७८ किलोमिटरको गतीमा आएको आँधीले बन्दरगाह सहर बेइरामा ठूलो क्षति पुर्‍याएको छ ।

राष्ट्रसंघीय सहायता कर्मचारीले सोफाला प्रान्तको राजधानी बेइराका सबै घर ध्वस्त भएको जनाए । उक्त क्षेत्रमा करिब ५ लाख मानिस बसोबास गर्छन् ।

राष्ट्रसंघीय विश्व खाद्य कार्यक्रमका जेराल्ड बोउर्केले भने, 'क्षति नपुगेको कुनै घर छैन । दूरसञ्चार अवरुद्ध छ भने विद्युत् आपूर्तिका लागि टाँगिएका तार यत्रतत्र छरिएका छन् ।' विभिन्न स्थानमा सडक तथा जमिनहरु भासिएको छ । रूखका टुप्पामा तथा घरका छलतमा बसेका थुप्रै मानिसको उद्धार गरिएको रेडक्रसले जनाएको छ ।

आँधीले करिब ५० किलोमिटर क्षेत्र पूर्णरूपमा डुबानमा परेको जनाइएको छ । सेभ द चिल्ड्रेनका अनुसार बुजी नदीका तटबन्ध भत्केपछिको बाढी उक्त भूभाग जलमग्न भएको हो । उक्त संस्थाले बुजी सहरका करिब २ हजार ५ सय बालबालिका आँधी प्रभावित भएको अनुमान गरेको छ ।

मोजाम्बिक सरकारले कम्तीमा ६ लाख मानिस आँधीका कारण प्रभावित भएका तथा एक लाखलाई तत्काल उद्धारको आवश्यकता रहेको जनाएको छ ।

गत बिहीबारको वर्षपछिको आँधी आउन थालेको भए पनि उद्धारकर्ताहरु प्रभावित क्षेत्रमा आइतबारदेखि खटाइएको हो । अधिकारीहरुले क्षतिको विवरण संकलन भइरहेको जनाउँदै मृतकहरुको संख्या बढी हुन सक्ने जनाए ।
बेइराको निरीक्षणमा गएका राष्ट्रपति नुसीले आँधीले 'विध्वंसकारी प्रभाव' पारेको बताए । उनले हवाई निरीक्षणका बेला बाढीको भेलमा मानिसको शव तैरिरहेको देखेको बताए ।

आँधीले छिमेकी जिम्बावे र मलावीसमेत प्रभावित भएका छन् । जिम्बाबे सरकारले आँधीका कारण ९८ जनाले ज्यान गुमाएका तथा २ सयभन्दा बढी हराइरहेको जनाएको छ । आँधीले क्षति पुर्‍याएका करिब २० हजार घरमध्ये ६ सय पूर्णरूपमा ध्वस्त छन् ।

अन्तर्राष्ट्रिय सञ्चारमाध्यमका अनुसार मलावीमा आँधी अगावैको भीषण वषर्ापछिको बाढी पहिरोका कारण १ सय २२ जनाले ज्यान गुमाएका छन् । मोजाम्बिकको उत्तरी तथा मलावीमा दक्षिणी भेगमा अझ केही दिन वषर्ा हुने जनाइएको छ ।
राष्ट्रसंघलाई उद्धृत गर्दै बीबीसीले मोजाम्बिकको आँधी प्रभावित क्ष्ाेत्रमा करिब १७ लाख मानिस रहेका उल्लेख गरेको छ । मलावीमा ९ लाख २० हजार मानिस प्रभावित भएको जनाइएको छ ।