काठमाडौं - विधानमा सहमति खोज्न कांग्रेस शीर्ष नेताहरु सक्रिय रुपमा लागिरहेका छन् । महासमिति बैठकलाई नै प्रभावित पारिरहेको विधान पदाधिकारी संख्याको लफडामा अल्झिएको छ । पदाधिकारी नै बढाउने या नबढाउने भन्ने अवस्थाबाट सुरु भएको विवादलाई नेताहरुले एक हदसम्म सुल्झाएका छन् । पदाधिकारी संख्या बढाउन संस्थापन र पौडेल–सिटौला पक्ष सहमत भएका छन् ।

बन्दसत्र नै स्थगित गरी कांग्रेसका पदाधिकारी र विधान मस्यौदा समितिका सदस्य कांग्रेस संसदीय दलको कार्यालय सिंहदरबारमा अन्तिम कसरतमा छ । तर, पदाधिकारी संख्यामा भने विवाद कायमै छ । ११ वा ८ बनाउने र कसरी निर्वाचन गर्ने भन्नेमा कुरा नमिलेको मस्यौदा समितिका एक सदस्यले बताए ।

सभापति शेरबहादुर देउवाले ८ पदाधिकारी बनाउँदा सभापति, उपसभापति, महामन्त्री, कोषाध्यक्ष र सहमहामन्त्री एक–एक निर्वाचित गर्ने अरु बाँकी मनोनित गर्ने मत राखेका छन् । तर, पौडेल पक्षले पदाधिकारीमा सभापति, एक उसभापति, एक महामन्त्री, एक कोषाध्यक्ष र एक सहमहामन्त्रीको निर्वाचन गर्ने तथा उपसभापति, महामन्त्री र सहमहामन्त्री एक–एक जना केन्द्रीय समितिबाट निर्वाचित गर्ने विकल्प ल्याएका छन् । यिनै विकल्पबाट विधानलाई टुंग्याउन अन्तिम छलफल भइरहेको छ ।