काबुल - तालिबानले अफगानिस्तानको राजधानी काबुल र कान्दाहार जोड्ने महत्त्वपूर्ण राजमार्गमा पर्ने गज्नी सहरमा एउटा ठूलो आक्रमण गरेको छ ।

बिहीवार राति तालिबान लडाकुहरूले गज्नीका केही भागहरू आफ्नो नियन्त्रणमा लिएका अधिकारीहरूले बताएका छन् । तर पछि उनीहरूलाई धपाइयो ।

प्रान्तीय सरकारका अनुसार सो आक्रमणमा ३० तालिबान लडाकु र एक सरकारी सुरक्षाकर्मीको मृत्यु भएको छ ।

धेरै घरहरू क्षतिग्रस्त भएकाले हताहत हुनेहरूको सङ्ख्या बढ्नसक्ने देखिएको छ ।

प्रान्तीय सरकारका प्रवक्ता मोहम्मद आरिफ नूर गज्नीले बताएअनुसार रातिको घटनामा कम्तीमा पनि आठ गैरसैनिक र सात सरकारी सुरक्षाकर्मीहरू घाइते भएका छन् ।

गज्नीमा अहिले विशेष सुरक्षा फौज खटाइएको छ। केही स्थानमा आक्कलझुक्कल गोली चलेको सुनिन्छ ।

केही वर्षयता कुनै प्रान्तीय सदरमुकाममा तालिबानले आक्रमण एवम् प्रवेश गरेको यो चौथो पटक हो ।

सयौँ लडाकुहरू सो आक्रमणमा संलग्न रहेका र प्रहरी मुख्यालयसमेत सरकारी भवनहरू नियन्त्रणमा लिइएको दाबी यसअघि तालिबानले गरेको थियो ।

“हामी एकदमै तर्सियौँ। सहरमा र वरिपरि जहाँ पनि तालिबानहरू घुम्दैछन्,” स्थानीय पसले मोहम्मद हलीमले समाचार संस्था एएफपीलाई बताए ।

केही महिनाअघि तालिबान लडाकुहरूले छोटो समयका लागि पश्चिमी नगर फराह आफ्नो नियन्त्रणमा लिएको थियो । सन् २०१५ र २०१६ मा लामै समय उनीहरूले उत्तरमा रहेको कुन्डुज आफ्नो नियन्त्रणमा राखे ।

अमेरिकी सेनाको एउटा सहयोग अभियानले तालिबानलाई गज्नीबाट लखेट्न हेलिकप्टरहरू र एउटा ड्रोन परिचालन गरिएको बताएको छ । गज्नीमा डेढ लाख मानिसहरू बसोबास गर्छन् ।

यो आक्रमण भूभाग आफ्नो अधीनमा पार्ने तालिबानको अर्को असफल प्रयास भएको टिप्पणी एक अधिकारीले गरेका छन् ।

काबुल र गज्नी जोड्दै दक्षिण जाने राजमार्ग शुक्रवार बन्द गरिएको छ ।

सरकारसँग शान्तिवार्तामा बस्न तालिबानलाई दबाव परेका बेला यो आक्रमण भएको छ ।

इदमा गरिएको तीनदेनि युद्धविरामपछि गत जुन महिनामा तालिबान र अमेरिकी अधिकारीहरूबीच कतारमा एउटा गोप्य भेटघाट भएको थियो ।

सन् २००१ मा अमेरिकी नेतृत्वको सैन्यले तालिबानलाई सत्ताबाट धपाएपछि भएका लडाइँमा दशौँ हजार अफगानको ज्यान गइसकेको छ ।

विगतमा गरिएका शान्तिवार्ता तथा युद्धविरामका प्रस्तावहरू खासै उपलब्धिपूर्ण भएका थिएनन् ।

अफगानिस्तानलाई सघाउन खटिएका विदेशी सेनाहरूले सन् २०१४ मा अफगानिस्तान छाडेका थिए ।

त्यसपछि तालिबानले देशभरि आफ्नो प्रभावक्षेत्र विस्तार गर्ने उद्देश्य राखेको देखिन्छ ।

विगतमा आफ्नो नियन्त्रणबाट खोसिएका क्षेत्रहरू पुन: कब्जा गर्ने प्रयास तालिबान लडाकुहरूले गरिरहेका छन् ।

सात महिनाअघि प्रकाशित बीबीसीको अध्ययनअनुसार अफगानिस्तानको ७० प्रतिशत भूभागमा तालिबान विद्रोहीको सक्रिय उपस्थिति छ । बीबीसी