पाकिस्तान - पाकिस्तानमा बुधबार भएको आमचुनावको परिमाणलाई राजनीतिक पार्टीहरुको एक समूहले अस्वीकार गरेको छ । अहिलेको चुनावी परिणाम अनुसार पूर्वक्रिकेटर इमरान खान निर्वाचीत भएर प्रधामन्त्री हुने निश्चित भएपछि अन्य राजनितीक पार्टीहरुको उक समूहले परिणाम अस्वीकार गरेको हो । यस्तै, प्रतिद्वन्द्वी पार्टीहरूले चुनावमा धाँधली भएको आरोप लगाएका छन्।

चुनावमा धाँधली भएको आरोप लगाइए पनि इमरान खानको पार्टीको आकारले थुप्रै पर्यवेक्षकहरूलाई नै चकित पारेको बीबीसीले जनाएको छ । परिणाम अस्वीकार गरेका ती पार्टीहरूको संयुक्त छलफलपछि इस्लामाबादमा एक पार्टी नेताले आफूहरू पुनः निर्वाचनको माग गर्दै आन्दोलन गर्ने बताएका छन्।

प्रतिद्वन्द्वी पार्टीमा पूर्व सत्तारुढ दल पीएमएल-एन पनि छ, जसले यसअघि आफू विपक्षमा बस्न तयार रहेको बताएको थियो। भ्रष्टाचारको मुद्दामा दोषी ठहर भइ जेलमा रहेका पूर्वप्रधानमन्त्री नवाज शरिफका भाइ शहबाज शरिफले पार्टीले संसद् बहिष्कार गर्ने वा नगर्ने भन्ने निर्णय हुन बाँकी रहेको बताएका छन्।

पत्रकार सम्मेलनमा शरिफकै छेउमा बसेका एमएमए पार्टीका नेता तथा प्रवक्ता मौलाना फजालुर रहमानले फेरि चुनाव गराउनका लागि आफूहरू आन्दोलन गर्ने र प्रदर्शनहरू हुने बताएका छन्।

एक दर्जनभन्दा बढी पार्टीका नेताहरूले चुनावपछि एउटा संयुक्त रणनीति बनाउनका लागि उक्त पत्रकार सम्मेलन गरेका थिए। चुनावमा खान र शरिफबीच प्रतिस्पर्धा हुने देखिएको थियो। धेरैजसो मतगणना भइसक्दा खानको पार्टीले राष्ट्रिय सभाको २७२ स्थानमध्ये ११५ मा अग्रता लिएको छ, जुन ६४ सीटमा अग्रता लिएको पीएमएल-एन भन्दा निकै अगाडि हो।

तेस्रो स्थानमा बिलावल भुट्टो जरदारीको पाकिस्तान पिपुल्स पार्टी रहेको छ, जसले ४३ सीट जितेको छ। बिलावल हत्या गरिएकी पूर्वप्रधानमन्त्री बेनजिर भुट्टोका छोरा हुन्।

पीपीपी पार्टीले भने शुक्रवार भएको प्रतिद्वन्द्वी पार्टीहरूको भेलामा सहभागिता जनाएको थिएन। बहुमतका लागि जम्मा १ सय ३७ सीट आवश्यक पर्छ र प्रधानमन्त्री हुने बाटोमा देखिएका इमरान खानले गठबन्धन सरकार बनाउनुपर्ने देखिन्छ। -बीबीसी