काठमाडौँ - कांग्रेसले पञ्चायत र राणासँग लडेर प्रजातन्त्र ल्याएको भन्दै कांग्रेस सभापति शेरबहादुर देउवाले सर्वसत्तावाद लाद्न उद्यत कम्युनिस्टसँग पनि लड्ने बताए । अहिले निषेधित क्षेत्र तोक्ने, शान्तिपूर्ण आन्दोलन गर्न नदिने कम्युनिस्टहरूले बोल्न, लेख्नसमेत नदिने दिन आउन सक्ने बताए ।

देउवाले शान्तिपूर्ण आन्दोलन गर्न नपाउने गरी हस्तक्षेप गर्दै निषेधित क्षेत्र तोक्ने कम्युनिस्ट सरकार कहिल्यै प्रजातन्त्रवादी बन्न नसक्ने आरोप लगाएका छन् । कांग्रेसका संस्थापक बिपी कोइरालाको ३६औँ स्मृति दिवसका अवसरमा आइतबार केन्द्रीय कार्यालय सानेपामा आयोजित कार्यक्रममा सभापति देउवाले यस्तो आरोप लगाएका हुन् ।

‘बिपी कम्युनिस्टसँग मिल्नै हुन्न भन्नुहुन्थ्यो । पहिलोपटक शान्तिपूर्ण प्रदर्शनसमेत गर्न नदिने कम्युनिस्टहरू सर्वसत्तावादी शासन लाद्न उद्यत छन्,’ देउवाले भने, ‘बिपीले कम्युनिस्टहरूलाई उसैवेला चिन्नुभएको रहेछ, हामीले अहिल्यै कम्युनिस्टलाई चिन्यौँ । उनीहरू कहिल्यै प्रजातन्त्रवादी हुन सक्दैनन् ।’

केसीको माग जायज
सभापति देउवाले अनशनरत डा. गोविन्द केसीको माग जायज भएको बताए । ‘माथेमा आयोगको रिपोर्टलाई आधार मानेर सबैसँग सल्लाह गरेर अध्यादेशलाई हामीले अगाडि बढाउन खोज्यौँ,’ देउवाले भने, ‘तर, प्राइभेट कलेज खोली पैसा खान खोज्नेहरू उद्यत छन् । गोविन्द केसीको माग जायज छन् । हामी समर्थनमा छौँ । उहाँको माग पूरा गर्न र जीवन बचाउन तयार छौँ ।’

पैसाको राजनीति अन्त्य गरे बिपीको सच्चा अनुयायी
कार्यक्रममा नेता रामचन्द्र पौडेलले बिपीले देखेको संविधानसभाबाट संविधान बनाएर राजनीतिक अधिकार जनताले पाएको बताए । तर, जनताको जीवनस्तर उठाउन, रोजगार र उद्यमी बनाउनुपर्ने वेला आएको उनको भनाइ थियो । ‘राजनीतिक अधिकार हामीले प्राप्त गरिसकेका छौँ । अब गाउँ–गाउँसम्मका जनताले रोजगारी अवसर पाउनुपर्छ,’ पौडेलले भने ।

बिपी आर्थिक मामिलामा स्वच्छ हुँदा राजाहरूले पनि चार्ज लगाउन नसकेको उनले बताए । ‘अरू मन्त्रीलाई राजाले चार्ज लगाए पनि आर्थिक मामिलामा बिपीमाथि राजाले कहिल्यै चार्ज लगाउन सकेनन् । किनकि उहाँ स्वच्छ हुनुहुन्थ्यो,’ पौडेलले भने, ‘पैसाको राजनीति निरुत्साहित गर्ने काम गरे हामी बिपीको सच्चा अनुयायी हुन्छौँ ।’ गोविन्द केसीको माग देशका दूरदराजसम्म पनि गुणस्तरीय शिक्षा र स्वास्थ्य पुगोस् भन्ने रहेको भन्दै उनले केसीका माग छिटो पूरा गर्नुपर्ने बताए ।

सरकार नयाँ शोषक वर्ग जन्माउने शैलीमा अघि बढेको भन्दै खबरदारी गर्न कांग्रेसले अभियान नै चलाउने उनले जानकारी दिए । ‘सरकार स्वास्थ्य र जल माफिया जन्माउने शैलीमा अघि बढेको छ,’ पौडेलले भने, ‘हामीले १५ साउनको विरोध कार्यक्रम सरकारलाई चेतावनी दिन, सचेत गराउन सार्वजनिक गरेका छौँ । सरकार सुध्रिएन भने विरोधका अरू कार्यक्रम पनि सार्वजनिक गर्छौं ।’

गुटबन्दी अन्त्य गर्न शशांकको जोड
कांग्रेस महामन्त्री एवं बिपीपुत्र डा. शशांक कोइरालाले सभापति देउवा र नेता पौडेलललाई मिल्न आग्रह गरे । ‘बिपीको स्मृति दिवसका अवसरमा मैंले एउटा कुरा भन्नैपर्ने हुन्छ । तपाईं सभापति र देउवा दुवै यहीँ हुनुहुन्छ,’ शशांकले भने, ‘पार्टी एक हुनैपर्छ । यसमा हामी सबैको भलो हुन्छ । पार्टी एक गराउनका लागि हामीले के गर्नुपर्छ हामी तयार छौँ ।’

बिपी कार्यकर्ताको भावनालाई सम्बोधन गर्न सक्ने दूरदृष्टि भएका नेता भएको भन्दै बिपीको बाटोमा हिँडे मात्रै उनीप्रति सच्चा श्रद्धाञ्जली हुने कोइरालाले बताए । कार्यक्रममा कोषाध्यक्ष सीतादेवी यादव, पूर्वउपसभापति गोपालमान श्रेष्ठ, पूर्वसहमहामन्त्री डा. रामशरण महत, केन्द्रीय सदस्य बालकृष्ण खाणसहितका नेताले बिपीले देखाएको बाटोमा हिँड्न कांग्रेस एकजुट भएर अगाडि बढ्नुपर्ने बताएका थिए ।

नयाँ पत्रिका