काठमाडौँ - राष्ट्रिय प्रजातन्त्र पार्टीले केन्द्रमा २० विभाग र समिति गठन गरेको छ । अध्यक्ष कमल थापाले पार्टी विधानबमोजिम बिहीबार २० समिति र विभाग गठन गर्दै संयोजकसमेत तोकेका छन् । संयोजक तोकिएकाहरू पार्टीका पदाधिकारी र केन्द्रीय सदस्य छन् ।

पार्टी प्रवक्ता भुवन पाठकले जारी गरेको विज्ञप्तिअनुसार अध्यक्ष थापा सूचना तथा प्रविधि विभागको संयोजक आफैँ भएका छन् । वरिष्ठ उपाध्यक्ष बुद्धिमान तामाङ राजनीतिक विभाग, उपाध्यक्ष राजीव पराजुली अनुशासन समिति र अर्का उपाध्यक्ष टंक ढकाललाई स्थानीय निकाय परिचालन विभागको संयोजक बनाइएको छ ।

त्यस्तै, महामन्त्री राजेन्द्र लिङ्देनलाई संगठन, दिलविकास राजभण्डारीलाई पर्यटन, महामन्त्री जयन्त चन्दलाई अन्तर्राष्ट्रिय सम्बन्ध विभागको संयोजक तोकिएको छ । कोषाध्यक्ष उद्धव पौडेल आर्थिक, प्रवक्ता सुशील श्रेष्ठ संयोजित संगठन समन्वय, प्रचार विभाग प्रमुखमा मोहन श्रेष्ठ तोकिएका छन् ।