एजेन्सी - नाइजेरियाको प्लेटो राज्यमा किसान र फिरन्ते गोठालाहरूबीचको हिंसामा कम्तीमा ८६ जनाको ज्यान गएको प्रहरीले जनाएको छ ।

बेरोम आदिवासी किसानहरूले फुलानी समुदायका गोठालाहरूमाथि आक्रमण गरेपछि बिहीवार हिंसा शुरू भएको केही विवरणमा जनाइएको छ ।

त्यसपछि शनिवार प्रत्याक्रमणमा थप मानिसहरूको ज्यान गएको हो ।

जमिनका लागि लड्दै आएका आदिवासी समूहहरूबीच सो क्षेत्रमा हिंसाको लामो इतिहास रहिआएको छ ।

घटनापछि प्लेटो राज्यका तीनवटा क्षेत्रमा निषेधाज्ञा जारी गरिएको छ ।

घटनापछि गाउँहरूमा गरिएका खोजबिनका क्रममा ८६ जना मारिएको र ६ जना घाइते भएको पाइएको सो राज्यका प्रहरी प्रमुख युन्डी एडीले बताए ।

उनका अनुसार ५० वटा घरका साथै १५ वटा मोटरसाइकल र दुईवटा गाडी पनि जलाइएको छ ।

लागोसस्थित बीबीसीका एकजना संवाददाता भन्छन्, पुरानो द्वन्द्व क्रुरताको नयाँ तहमा पुगेको छ ।

जमिनमा पहुँच र जनावरको चरनको अधिकारलाई लिएर मध्य नाइजेरियामा किसान र फिरन्ते गोठालाहरूबीच भिडन्तहरू हुँदै आएका दृष्टान्त छन् ।

तर आक्रमण र प्रत्याक्रमणका घटना अहिले जातीय लडाइँमा परिणत हुन थालेका छन् ।

गत वर्ष त्यस्ता आक्रमण र प्रत्याक्रमणमा हजारौँ मानिसले ज्यान गुमाएका छन् ।

फिरन्ते गोठालाहरू फुलानी आदिवासी हुन् जसमध्ये अधिकांश मुस्लिम छन् भने किसानहरू मुख्यतया ईसाई हुन् । बीबीसी