काठमाडौं - सिंगापुरमा मंगलबार बिहान भएको अमेरिकी राष्ट्रपति ट्रम्प र उत्तर कोरियाली नेता किम जोङ उनबीच भएको वार्तामा चार बुँदे सहमति भएको छ । ट्रम्प र किमबीच भएको वार्तापछि दुवैले बृहत् सम्झौतामा हस्ताक्षर गरे। सम्झौतामा भएका चार बुँदा सार्वजनिक गरिएको छ । ट्रम्पले सम्झौतालाई बृहत् र महत्त्वपूर्ण भनेका छन्।

हस्ताक्षरपछि ट्रम्पले पत्रकारहरूलाई फोटो खिच्नका लागि सम्झौतापत्र स्पष्ट रूपमा देखाएका थिए ।

यी हुन् सम्झौताका बुँदा :
१. शान्ति र समृद्धिका लागि सम्झौताको पहिलो बुँदा दुई देशबीच नयाँ सिराबाट दुवै देशका जनताको चाहना अनुरूप सम्बन्ध स्थापना गर्ने प्रतिबद्धता जनाइएको छ।

२. कोरियाली प्रायद्वीमा शान्ति स्थापनाका लागि आवश्यक पहल गर्ने र नयाँ ढंगले अगाडि बढाउने। पुराना प्रतिबद्धताहरू पूरा गर्ने।

३. गत अप्रिलमा अन्तरकोरियाली शिखर सम्मेलनका बेला भएको आणविक निःशस्त्रीकरणलाई कार्यान्वयन गर्ने। पानमुन्जोम घोषणापत्रमा उत्तर कोरियाली नेता किम र दक्षिण कोरियाली राष्ट्रपति मुन जाई इनबीच भएको सम्झौतालाई कार्यान्वयन गर्ने।

४. कोरियाली युद्धका क्रममा बन्दी बनाइएका युद्धवन्दीहरुलाई स्वदेश फिर्ती तथा परिपुरणको समहति समेत भएको छ।