एजेन्सी - सन् २००६ को विश्वकप फुटबल जर्मनीमा आयोजना भएको थियो । उक्त विश्वकपका क्रममा एकपछि अर्को गर्दै थुप्रै विवाद देखिएका थिए । खासगरी रेफ्रीको एउटा गलत निर्णयका कारण उक्त विश्वकप सबैभन्दा बढी विवादित बनेको थियो । जुन २२ तारिखमा समूह ‘एफ’ अन्तर्गत अस्ट्रेलिया र क्रोएसियाको खेल थियो । उक्त खेलमा इङ्ल्यान्डका ग्राहम पोल रेफ्रीको भूमिकामा थिए।

खेलका क्रममा रेफ्री पोलले क्रोएसियाका एक खेलाडीलाई तीन पटक पहेँलो कार्ड देखाएका थिए । तेस्रो पटक पहेँलो कार्ड दिएपछि मात्र रेफ्रीले ती खेलाडीलाई रातो कार्ड पनि देखाएका थिए । खेलको नियमअनुसार दोस्रो पटक पहेँलो कार्ड पाउनेबित्तिकै खेलाडीले मैदान छाड्नुपर्ने हुन्छ । यद्यपि खेलपछि रेफ्री पोलले आफूले थाहा नपाएर यस्तो गल्ती भएको प्रतिक्रिया दिएका थिए ।

खेल सुरु भएको ६१औं मिनेटमा क्रोएसियाका जोसिप सिमुनिचले पहेँलो कार्ड पाएका थिए । त्यसपछि ९०औं मिनेटमा उनलाई रेफ्री पोलले दोस्रो पटक पहेँलो कार्ड देखाए । दोस्रो पटक पहेँलो कार्ड पाउँदा पनि न खेलाडी सिमुनिचले मैदान छाडे न त रेफ्री पोलले नै उनलाई मैदानबाट बाहिर जान निर्देशन दिए । ९३औं मिनेटमा रेफ्री पोलले खेल सकिएको जनाउ दिन सिट्ठी बजाए । त्यसपछि सिमुनिचले रिसाउँदै गएर रेफ्री पोललाई धकेले । त्यही झोंकमा रेफ्रीले उनलाई तेस्रो पटक पहेँलोसँगै रातो कार्ड पनि देखाएका थिए।

सिमुनिचले खेल सकिनुअघि नै दुईवटा पहेँलो कार्ड पाइसकेको विषयमा रेफ्री पोलसँगै सहायक रेफ्री र फोर्थ अफिसियलसमेत अनभिज्ञ थिए । उक्त खेल २—२ गोलको बराबरीमा सकिएपछि अस्ट्रेलिया समूह उपविजेताका रूपमा अघिल्लो चरणमा प्रवेश गरेको थियो । उक्त खेलमा आफ्नो टोली पराजित भएको भए रेफ्रीको विरुद्घमा उजुरी गर्ने पर्याप्त आधार आफूसँग भएको प्रतिक्रिया अस्ट्रेलियन फुटबल महासंघका प्रमुख कार्यकारी जोन ओनिलले दिएका थिए ।

अन्नपुर्ण