पार्टी बिघटनको तयारीमा एमाले-माओवादी, अध्यक्षद्वयबिच यस्तो भयो समझदारी !

2018-05-07

काठमाडौँ - जेठ पहिलो सातासम्म नयाँ पार्टी र नेतृत्व घोषणा गर्ने तयारी

एमाले र माओवादी केन्द्रले आन्तरिक तयारी सकेर पार्टी एकता घोषणाका लागि जेठ पहिलो साता ‘संयुक्त अधिवेशन’ बोलाउने भएका छन् ।

एमाले अध्यक्ष केपी ओली र माओवादी अध्यक्ष पुष्पकमल दाहाल प्रचण्डले पछिल्लो छलफलमा दुवै पार्टी विघटन र नयाँ पार्टी घोषणाका लागि ‘संयुक्त अधिवेशन’ बोलाउने समझदारी गरेका हुन् ।

जेठको पहिलो साता संयुक्त अधिवेशन बोलाउने सहमति भइसके पनि पार्टी एकता संयोजन समितिको बैठकमार्फत मिति तोक्ने तयारी छ ।

बालुवाटारनिकट स्रोतले पनि केन्द्रीय कमिटीसहित दशवटै तहका कमिटीको आकार प्रतिशतमा नभएर दुवै पार्टीबाट योग्य नेता छनोट गरेर टुंग्याउने गरी अध्यक्षकै तहमा गृहकार्य भइरहेको दाबी गरेको छ ।

‘माओवादी केन्द्रका अध्यक्षज्यूले पनि पार्टीका तर्फबाट योग्यहरूको खाका तयार पारिसक्नुभएको छ,’ त्यसबाटै नयाँ पार्टीमा समावेश गर्नुहुनेछ, बालुवाटार स्रोतले भन्यो, ‘एमालेको तहगत संरचना रहेकाले छनोटका लागि कुनै समस्या छैन ।’

दुई अध्यक्षबीच २० वैशाखमा भएको लामो छलफलले एकतासँग जोडिएका सबै विषय टुंगो लगाएको हो । त्यस दिन ओली र प्रचण्डबीच दुईपटक छलफल भएको थियो भने एमाले नेता माधवकुमार नेपाल र प्रचण्डबीच पनि छुट्टै कुराकानी भएको थियो ।

प्रतिवेदनको भाषा कसरी मिलाउने भन्नेमा समेत सहमति जुटिसकेकाले त्यसलाई लिखित रूप दिने काम मात्र बाँकी रहेको माओवादी नेता जनार्दन शर्माले दाबी गरे ।

यस्तो छ समझदारी

१. नाम र चुनाव चिह्न
विवादित भनिएको चुनाव चिह्न, विधानको प्रस्तावना र केन्द्रीय कमिटीको संख्यामा दुई अध्यक्षले सहमति गरेका छन् । एकीकृत नयाँ पार्टीको नाम नेपाल कम्युनिस्ट पार्टी र चुनाव चिह्न सूर्य राख्ने सहमति भएको छ ।

२. जनयुद्धको प्रसंग
तत्कालीन नेकपा माओवादी नेतृत्वमा भएको जनयुद्ध राजनीतिक परिवर्तनका लागि महŒवपूर्ण परिघटना भएको प्रसंग विधानमा लेख्ने सहमति भएको छ ।

३. केन्द्रीय कमिटी
केन्द्रीय कमिटी २९९ सदस्य बनाउने भनिएकोमा अब संख्या ३५१ बनाउने सहमति भएको छ । यसमा एमालेबाट करिब २०० र माओवादीबाट करिब १५० सदस्यले प्रतिनिधित्व गर्नेछन् । नेताहरूले प्रतिशत होइन, योग्यता र अनुभवका आधारमा नेताहरूलाई समेट्ने समझदारी बनाएका छन् ।

४. संयोजन समिति बैठक
दुई अध्यक्षको समझदारी अनुमोदन गर्दै घोषणासभाको मिति टुंगो लगाउन पार्टी एकता संयोजन समितिको बैठक बस्ने तयारी छ । माओवादी नेता जनार्दन शर्माले दुई अध्यक्षबीच अब हुने भेटघाटलगत्तै संयोजन समितिको बैठक डाकिने बताए ।

५. दुवै पार्टी भंग हुने
एमाले र माओवादी केन्द्रले छुट्टाछुट्टै अन्तिम केन्द्रीय कमिटी बैठक बोलाउनेछन् । दुवै पार्टीका केन्द्रीय कमिटीले आ–आफ्नो पार्टी विघटन गर्ने र एकअर्कासँग एकीकरण गर्ने औपचारिक निर्णय गर्नेछन् ।

६. संयुक्त अधिवेशन
पार्टी एकता संयोजन समितिले तोकेको मितिमा दुवै पार्टीको संयुक्त अधिवेशन आयोजना हुनेछ । सो अधिवेशनले दुवै पार्टी भंग भएको निर्णय अनुमोदन गर्दै नेतृत्वसहित नयाँ पार्टी गठन गर्ने निर्णय गर्नेछ । सोही निर्णयअनुसार नेपाल कम्युनिस्ट पार्टी निर्वाचन आयोगमा दर्ता हुनेछ ।

 एकता हुँदैन कि भन्ने द्विविधा समाप्त : विष्णु पौडेल, उपमहासचिव, एमाले

दुई अध्यक्षबीच सबै विषयमा सहमति भइसकेको छ । अब एकता संयोजन समितिको बैठक बसेर औपचारिकता दिन मात्र बाँकी हो ।

त्यसैले अब एकता हुँदैन कि भन्ने द्विविधा समाप्त भएको छ । दुई पार्टीले अलग–अलग केन्द्रीय कमिटी बैठक बसेर एकतामा जाने निर्णय गर्न बाँकी छ । त्यो निर्णय भइसकेपछि एकीकृत पार्टीको संरचना पनि तयार हुन्छ ।

त्यसपछि त्यो संरचनासहित नयाँ पार्टी दर्ताका लागि हामी निर्वाचन आयोगमा जान्छौँ । तर, त्यसअघि दुवै पार्टीको संयुक्त बैठक बस्नुपर्छ । त्यस (संयुक्त बैठक)लाई अधिवेशन या बैठक जे पनि भन्न सकिन्छ ।

जेठ पहिलो साता संयुक्त अधिवेशन : जनार्दन शर्मा, नेता, माओवादी केन्द्र

जेठको पहिलो साताभित्र दुवै पार्टीको संयुक्त अधिवेशन हुन्छ । त्यो अधिवेशनमा दुवै पुराना पार्टी विघटन र नयाँ पार्टीको घोषणा हुन्छ ।

त्यसलाई संयुक्त बैठक होइन, अधिवेशन नै भनिनेछ । तर, एकता संयोजन समितिबाट मितिको औपचारिक निर्णय गर्न भने बाँकी छ ।

एकतासम्बन्धी प्रतिवेदनलाई दुवै अध्यक्षले भाषा हेरेर मिलाइसक्नुभएको छ । अब सीधै संयोजन समितिमा लगेर पारित हुनेछ । तर, त्यसअघि दुवै अध्यक्षले परामर्श गर्ने सम्भावना छ । सोमबार दुई अध्यक्ष बस्नुभो भने सम्भवतः सल्लाह गरेर पार्टी एकता संयोजन समितिको बैठक बोलाउनुहुनेछ ।

 

नयाँ पत्रिकाबाट




थप समाचार


‘अध्यादेशमार्फत विधेयक टुंगो लगाउँछौँ’

‘अध्यादेशमार्फत विधेयक टुंगो लगाउँछौँ’

चिकित्सा शिक्षासम्बन्धी विधेयक पारित नहुँदै व्यवस्थापिका संसद्को कार्यकाल सकिएपछि उक्त विधेयकलाई अब अध्यादेशमार्फत टुंगो लगाइने एकजना मन्त्रीले बताएका छन्। संसद अस्तित्वमा नरहेपनि विधेयक पारित गराउन ...

२९ पछि लोकतान्त्रिक गठबन्धन घोषणा

२९ पछि लोकतान्त्रिक गठबन्धन घोषणा

निर्वाचन आयोगले तोकेको बन्दसूचीका उम्मेदवारको नाम पेस गर्ने समयसीमा पछि लोकतान्त्रिक गठबन्धनको घोषणा गरिने भएको छ । आयोगले २९ असोजसम्मका लागि समानुपातिकका उम्मेदवारको नाम पठाउने ...

त्रिशूलीमा खस्दा ट्रकसहित चालक बेपत्ता

त्रिशूलीमा खस्दा ट्रकसहित चालक बेपत्ता

मलेखु (धादिङ), साउन १२ । पृथ्वी राजमार्गअन्तर्गत गजुरी गाउँपालिका–२ बिहानी पम्प नजिकैबाट आज बिहान एउटा ट्रक त्रिशूली नदीमा खसेर बेपत्ता भएको छ । जिल्ला ट्राफिक ...




ट्रेन्डिङ