शुष्मा पन्थी, काठमाडौँ - नेपाल टेलिभिजनबाट प्रशारण हुने ‘मेरो भ्वाइस युनिभर्स’ र ‘मेरो डान्स युनिभर्स’को दोश्रो सिजनको घोषणा गरिएको छ। शनिवार एक कार्यक्रम गर्दै आयोजक संस्था इन्ट्रा नेपाल वेलफेयर एन्ड सपोर्ट फाउन्डेसनले दोश्रो सिजनका लागि प्रस्तोता र निर्णायक मण्डल घोषणा गरेको हो ।

जसअनुसार ‘मेरो भ्वाइस युनिर्भस’लाई सुरेश पौडेल र ‘मेरो डान्स युनिर्भस’लाई मौसमी गुरुङले निर्देशन गर्ने बताइएको छ ।

कार्यक्रममा ‘मेरो भ्वाइस युनिर्भस’मा गायक दीप श्रेष्ठ, सङ्गीतकार सुरेश अधिकारी, गायिका अन्जु पन्त, तृष्णा गुरुङ, गायक पुष्पन प्रधानले निर्णायकको भूमिका निर्वाह गर्ने जानकारी गराइयो ।

त्यस्तै, ‘मेरो डान्स युनिर्भस’मा निर्णायकको रुपमा अभिनेत्री मिथिला शर्मा, अभिनेता दीलिप रायमाझी, नृत्य निर्देशक शङकर विसी, किरण थापा र अभिनेत्री शिल्पा मास्के रहने बताइएको छ ।

कार्यक्रम सञ्चालकको रुपमा सञ्चारकर्मी नरेश भट्टराई, अभिनेत्री रीमा विश्वकर्मा, कमेडियन राजा राजेन्द्र पोखरेल, पूर्वमिस नेपाल नम्रता श्रेष्ठ रहने छन्। कस-कसले कुन कुन कार्यक्रम होस्ट गर्ने भन्ने अहिले खुलाइएको छैन।

दुबै प्रतियोगिताको अडिसन सन् २०२५ को जनवरी २५ बाट सुरू हुने बताइएको छ। जानकारी अनुसार अडिसन अमेरिका र क्यानडाको लागि जनवरी २५ र २६ मा अमेरिकास्थित कोलम्बस ओहायोमा, फेब्रुअरी १५ र १६ मा बेलायतको लन्डनमा, पोर्चुगलको लिस्बन, हङकङ र जापानको टोकियो मा अडिसन हुनेछ । फेब्रुअरी २२ र २३ मा युएईको दुबई, कतारको दोहा, थाइल्याण्डको बैकक, अस्ट्रेलियाको सिड्नी, नेपालको कास्कीस्थित पोखरामा अडिसन हुँदैछ । मार्च १ र २ मा भारतको मुम्बई नेपालगञ्ज, मार्च ८ र ९ मा भारतको सिलिगुढी, मार्च १५ र १६ मा झापाको दमक र मार्च २९ र ३० मा काठमाडौँमा अडिसन हुँदैछ ।

आयोजक संस्था इन्ट्रा नेपाल वेलफेयर एन्ड सपोर्ट फाउन्डेसन अफ अमेरिकाका अध्यक्ष डिल्ली अधिकारीले विश्वभर छरिएर रहेका नेपालीहरुको माझमा नेपाली भाषा र संस्कृतिलाई प्रबर्धन र विस्तार गरि जीवन्त राखिराख्न सघाउने उद्देश्यले यो गायन र नृत्य प्रतियोगिताको आयोजना गरिएको बताए ।

उनले भने, ‘हामीले यो कार्यक्रममार्फत नेपाली कला, संस्कृति र भाषालाई प्रवर्धन गर्न खोजेका हौँ । हामीले सोही कारण नेपाली संस्कृति र कला झल्किने प्रस्तुतीलाई अनिवार्य गरेका छौँ । अघिल्लो श्रृंखलाको तुलनामा सो झनै भव्य हुने उनले दावी गरे ।

उनले दुबै प्रतियोगिताका विजेताले जनही एक करोड, उपविजेताले जनही २५ लाख र तेश्रो हुनेले जनही १० लाख रुपैयाँसँगै अरु विभिन्न पुरस्कार प्राप्त गर्ने बताए ।