काठमाडौं - नेकपा माओवादी केन्द्रले कारबाही गरी पदमुक्त गरेपछि प्रभु साह विरोधमा उत्रिएका छन्। माओवादी केन्द्रले पार्टीका ४ सांसदलाई साधारण सदस्यसमेत नरहने गरी कारबाही गर्दै सांसदबाट समेत पदमुक्त गरेपछि कारबाहीमा पर्नेमध्येका एक साहले सामाजिक सञ्जालमार्फत आक्रोश पोखेका हुन्।

निर्वाचित सांसदलाई पदमुक्त गर्ने पार्टी अध्यक्ष पुष्पकमल दाहाल ‘प्रचण्ड’को कदम निरंकुशताको पराकाष्ठा भएको आरोप उनले लगाएका छन् । साह केपी ओली सरकारमा सहरी विकास मन्त्री रहेका छन्।

‘जनताबाट प्रत्यक्ष निर्वाचित सांसदलाई पद मुक्त गर्ने प्रचण्डको निर्णय लोकतन्त्रको उपहास एवम् निरंकुशताको पराकाष्ठा हो,’ उनले सामाजिक सञ्जालमा लेखेका छन्।

चुनाव जित्न नेकपा एमालेसँग एकता, सहकार्य गर्ने, नेकपा अध्यक्षको हैसियतमा सर्वोच्च अदालतमा पुनरावलोकन गर्ने र सरकारलाई दिएको समर्थन जारी राखेको भन्दै उनले अगाडि लेखेका छन्, ‘हामी साझा घोषणापत्र एवं संयुक्त मतबाट निर्वाचित जनप्रतिनिधिमाथि कथित दल त्यागको कानुनी डण्डा चलाउनु कुनै नैतिकताले सुहाउँदैन ।’

निर्वाचित जनप्रतिनिधिलाई त्रसित र सिंगै संसदलाई पंगु बनाउने यो कारबाहसकिो खेलले आफूलाई कथित संसद पुनर्स्थापनाको पक्षधर बताउने आज फेरि उदांगो भएको टिप्पणी साहले गरेका छन् ।

‘अहिलेकै संसद सुचारू हुनुपर्छ भनेर माग गर्ने तर सारमा जनभावना एवं लोकतान्त्रिक मान्यता विपरीत प्राविधिक, कानूनी आडमा सम्मानित सदन तथा जनताको सच्चा प्रतिनिधिको रुपमा क्रियाशील सांसदहरुको पदमाथि यसरी अनुचित रुपमा हमलाको दुष्प्रयास गर्नु आफैंमा प्रतिगामी कार्य हो,’ उनले लेखेका छन् ।

मंगलबार माओवादी केन्द्रले संसद सचिवालयमा प्रभु साहसहित सांसदहरु टोपबहादुर रायमाझी, लेखराज भट्ट र गौरीशंकर चौधरीलाई पदमुक्त गर्न पत्र दर्ता गराएको थियो ।