काठमाडौं - सार्वजनिक सम्पत्ति हिनामिनामा पक्राउ परेका काठमाडौं भ्युटावरका ठेकेदार मनोजकुमार भेटवाल लगायतका ६ जनालाई विशेष अदालतले धरौटीमा रिहा गर्न आदेश दिएको छ ।

साविक रोयल मर्चेन्ट बैंक एण्ड फाइनान्स लिमिटेडको रकम हिनामिना प्रकरणमा भेटवालसहित बसन्त मल्ल, विकास श्रेष्ठ, मधुवनलाल श्रेष्ठ, भैरवप्रसाद भेटवाल र रविन लामा पक्राउ परेका थिए ।

विशेष अदालतका न्यायाधीशहरू प्रेमराज कार्की, बालेन्द्र रुपाखेती र चन्द्रबहादुर सारुको इजलासले सोमबार ६ जनालाई नै धरौटीमा छाड्न आदेश दिएको विशेष अदालतका प्रवक्ता पुष्पराज पाण्डेयले जानकारी दिए ।

अख्तियारले काठमाडौं भ्यूटावर निर्माण गरिरहेका ठेकेदार भेटवाललाई सार्वजनिक संस्थाको सम्पत्ति बदनियत तथा लापरबाही गरी हिनामिना तथा नोक्सानी गरेको भन्दै मुद्दा दायर गरेको हो । उनीसँग १३ करोड (११ करोड ११ लाख र २ करोड १५ लाख) रुपैयाँ भन्दा बढी बिगो तथा कैद सजाय माग गरिएको छ ।

उक्त प्रकरणमा अख्तियारले छुट्टा छुट्टै ११ वटा मुदा दायर गरेको छ। निज ६ व्यक्तिको धेरै जसो मुद्दामा संलग्नता रहेको दावी गर्दै अख्तियारले प्रतिवादी बनाएको छ।

रकम हिनामिना गर्ने कार्यमा संलग्नहरुलाई माग भएको धरौटी रकमको योगफल निकाल्दा अभियुक्तहरुसंग कम्तिमा १५ हजार देखि अधिकतम ३ लाख ६० हजार रुपैयाँ धरौटी माग भएको प्रवक्ता पुष्पराज पाण्डेयले जानकारी दिए ।