काठमाडौं - चिनिया राजदूत होऊ यान्छीले नेकपा अध्यक्ष पुष्पकमल दाहाल प्रचण्डलाई भेटेकी छन्। दुईबीच बिहीबार बिहान प्रचण्ड निवास खुमलटारमा भेट भएको हो। उनीहरुबीच बिहान ९ बजेदेखि करिब आधा घण्टा कुराकानी भएको बताइएको छ।

उनीहरुबीच भएको कुराकानीको विस्तृत विवरण प्राप्त हुन सकेको छैन। नेकपाका विदेश विभाग उपप्रमुख विष्णु रिजालले दुई पक्षीय चासोका विषयमा छलफल भएको उल्लेख गरेका छन्।

नेकपामा विवाद हुँदा यान्छी भेटघाटमा सक्रिय हुने गरेकी थिइन्। तर यसपटक उनको सक्रियता कम देखिएको थियो।

नेकपा भने अनौपचारिक रुपमा विभाजन भइसकेको छ।

यस्तो छ, प्रचण्ड-यान्छीको पछिल्ला भेट शृंखला

वैशाख १९, २०७७: खुमलटारमा भेट। झन्डै एक घण्टा कुराकानी।
असार २५, २०७७: प्रचण्ड निवास खुमलटारमा भेट।
मंसिर ८, २०७७: खुमलटारमा प्रचण्डसँग भेट। भेटका लागि यान्छी बिहान ९ बजे नै खुमलटार पुगेकी थिइन्। उनले प्रचण्डलाई सी चिनफिङको पुस्तक उपहार पनि दिएकी थिइन्।
पुस ९, २०७७: खुमलटारमा भेट। भेटका लागि यान्छी बिहान ९ बजे खुमलटार पुगेकी थिइन्। करिब आधा घण्टा भेट।